قازاقستان وليمپيادالىق جارىستاردا دا، كاسىبي سپورتتا دا لايىقتى ورىن الدى. تاۋەلسىز مەملەكەت رەتىندە العاش رەت رەسپۋبليكا 1991 جىلى حالىقارالىق سپورتتىق جارىستارعا قاتىستى. 1994 جىلى نورۆەگيالىق ليللەحاممەردەگى وليمپيادا ويىندارىندا ەلىمىزدىڭ ۇلتتىق قۇراماسى دەبيۋت جاسادى. سودان بەرى قازاقستان سپورتشىلارى وليمپيادا ويىندارىنا 13 رەت قاتىسىپ، 70-تەن استام ماراپاتقا يە بولدى. گەنناديي گولوۆكين، دميتريي بالاندين، ەلدوس سمەتوۆ، يليا يلين، ولگا رىپاكوۆا، الەكساندر ۆينوكۋروۆ، زارينا دياس، يۋليا گالىشيەۆا جانە باسقا دا كوپتەگەن قازاقستاندىق سپورتشىلار وزدەرىن تانىتا الدى.
تاۋەلسىزدىك جىلدارىندا قازاقستان سپورتتىڭ كەيبىر تۇرلەرىندە لايىقتى تۇردە كوشباسشى بولدى. بۇل اسىرەسە جەكپە-جەك پەن بوكسقا قاتىستى. وليمپيادا ويىندارىنىڭ ناتيجەلەرى بويىنشا بوكسشىلار ەلىمىزدىڭ قورجىنىنا ءتۇرلى دەڭگەيدەگى كوپتەگەن ماراپاتتار اكەلدى. بۇل سپورتشىلاردىڭ اراسىندا شىعىسقازاقستاندىقتار از ەمەس. سولاردىڭ ءبىرى وليمپيادا چەمپيونى، ۇزىندىققا سەكىرۋگە ماماندانعان قازاقستاندىق جەڭىل اتلەتيكانىڭ پريماسى ولگا رىپاكوۆا. ول الەم چەمپيوناتتارىنىڭ ەكى دۇركىن كۇمىس جانە قولا جۇلدەگەرى، الەم چەمپيونى، ازيا ويىندارىنىڭ ءۇش دۇركىن جەڭىمپازى، ازيا ويىندارىنىڭ قولا جانە كۇمىس جۇلدەگەرى، ازيا رەكوردشىسى. قازاقستان رەسپۋبليكاسىنىڭ ەڭبەك سىڭىرگەن سپورت شەبەرى، حالىقارالىق دارەجەدەگى سپورت شەبەرى.
سپورتشىنىڭ ەرەن ەڭبەگىن مويىنداپ، ەلباسىنىڭ باستاماسىمەن وسكەمەندە ورتالىق ازيادا تەڭدەسى جوق ولگا رىپاكوۆا اتىنداعى جەڭىل اتلەتيكا عيماراتى سالىندى. ايتا كەتەيىك، شىعىس قازاقستاندا تاۋەلسىزدىك جىلدارى 450-دەن استام جاڭا نىسان اشىلدى. ونىڭ ىشىندە 17 دەنە شىنىقتىرۋ-ساۋىقتىرۋ جانە سپورت كەشەنى، بەس تەننيس كورتى، ەكى يپپودروم، ءۇش حوككەي ءمودۋلى، ءۇش باسسەين، ەكى تاۋ شاڭعىسى كەشەنى، 37 كۇرەس زالى، 139 شاعىن فۋتبول الاڭى، 137 حوككەي قورابى، 102 ستريت-ۆوركاۋت سپورت الاڭى بار. سونىمەن قاتار، "جەكپە-جەك" سارايى، وسكەمەندە ورتالىق جابىق ءجۇزۋ باسسەينى، سەمەيدە كوپفۋنكسيونالدى مادەني-سپورت كەشەنى، سپورتتاعى دارىندى بالالارعا ارنالعان مەكتەپ-ينتەرنات، سپورت ينتەرناتى سالىندى.
قازاقستانداعى تاعى ءبىر پەرسپەكتيۆالى سپورت تۇرى-ۆولەيبول. 1991 جىلدان باستاپ قازاقستاندىق كلاسسيكالىق جانە جاعاجاي ۆولەيبولىنىڭ سپورتشىلارى حالىقارالىق ارەنادا تۇراقتى تۇردە تابىستارعا قول جەتكىزىپ كەلەدى. كلاسسيكالىق ۆولەيبولدان قازاقستان ايەلدەر قۇراماسى بىرنەشە رەت ازيا جانە ازيا ويىندارىنىڭ، ازيا كۋبوگىنىڭ جۇلدەگەرى بولىپ، وليمپيادا ويىندارى مەن الەم چەمپيوناتتارىنا قاتىستى. قازاقستاندى الەمدىك ارەنادا ەلىمىزدىڭ بەس دۇركىن چەمپيونى – "التاي" شىعىس قازاقستان ايەلدەر ۆولەيبول كومانداسى لايىقتى كورسەتەدى. ايتا كەتەيىك، بيىل ۆولەيبولشىلار العاش رەت ازيا چەمپيوناتىنىڭ جەڭىمپازدارى اتاندى. ەندى كلۋبتىڭ الدىندا 2024 جىلعى وليمپيادا ويىندارىندا ءوزىن كورسەتىپ، الەمدەگى ەڭ مىقتى ءۇش كلۋبتىڭ قاتارىنا كىرۋ مىندەتى تۇر.
شىعىس قازاقستان مەن رەسپۋبليكانىڭ تاعى ءبىر داڭقتى سپورتشىسى فريستايلشى يۋليا گالىشيەۆا. 2018 جىلى ول پحەنچحان قىسقى وليمپياداسىندا قولا مەدال جەڭىپ الدى. بۇعان دەيىن قازاقستان تاريحىندا فريستايلدا وليمپيادا مەدالى بولعان ەمەس، سوندىقتان بۇل ەلىمىزدىڭ تۇڭعىش پرەزيدەنتى جوعارى باعالاعان تاريحي جەڭىس.
قازاقستاندا سپورتپەن جانە دەنە شىنىقتىرۋمەن اينالىسۋ ءۇشىن بارلىق قاجەتتى جاعدايلار جاسالعان. تاۋەلسىزدىك جىلدارىندا بالالار مەن جاسوسپىرىمدەر سپورتى ايتارلىقتاي دامىدى.
دەنە شىنىقتىرۋ جانە سپورت باسقارماسىنىڭ مالىمەتىنشە، تەك شىعىس قازاقستاندا 11،5 مىڭ سپورت سەكسياسى قۇرىلىپ، وندا 500 مىڭعا جۋىق ادام شۇعىلدانادى. وڭىردە سپورتتىڭ 94 ءتۇرى بويىنشا سپورتشىلار جاتتىعادى. ونىڭ ىشىندە 37 وليمپيادالىق، 26 وليمپيادالىق ەمەس، 16 پاراليمپيادالىق، 12 ۇلتتىق جانە ءۇش تەحنيكالىق سپورت تۇرلەرى بار.
تاۋەلسىزدىكتىڭ 30 جىلى ىشىندە وبلىستا 600-دەن استام حالىقارالىق دارەجەدەگى سپورت شەبەرى، 1،6 مىڭنان استام سپورت شەبەرى، 6،5 مىڭعا جۋىق سپورت شەبەرىنە كانديدات دايارلاندى. تاۋەلسىزدىك جىلدارى سپورتتىڭ ءار تۇرىنەن سپورتشىلار دايارلانىپ، جەتىستىككە جەتىپ، كوك تۋىمىزدى الەمدىك ارەنادا بيىككە كوتەرىپ كەلەدى.
