بتا بانكىنىڭ نەگىزىن قالاۋشى ەرجان تاتىشيەۆتى ولتىرگەنى ءۇشىن سوتتالعان مۇراتحان ءتوقمادي 2017 جىلى قاماۋدا بولعان ۋاقىتىن “ءبىر كۇن – ءبىر جارىم كۇن” ەسەبىمەن قايتا ەسەپتەۋدى سۇراپ، جازاسىنىڭ مەرزىمىن قىسقارتۋعا تالپىنعان. الايدا الاتاۋ اۋداندىق سوتى ونىڭ بۇل ءوتىنىشىن قاناعاتتاندىرمادى، دەپ حابارلايدى Dalanews.kz.
وسىعان دەيىنگى سوت وتىرىسىندا جانە بۇگىنگى وتىرىستا دا ءتوقمادي مەن ونىڭ ادۆوكاتى كەرۆەنوۆ سوتتان تاتىشيەۆتەر وتباسى مەن ولاردىڭ وكىلدەرىن پروسەستەن شەتتەتۋىن سۇرادى. سۋديا ق ر قىلىمىستىق اكىمشىلىك كودەكسىنىڭ 23-بابىنا سايكەس، جابىرلەنۋشىلەردىڭ سوت وتىرىنا قاتىسۋ قۇقى بارىن راستادى. جابىرلەنۋشى تاراپتىڭ قۇقىقتارىن ادۆوكاتتار امانجول مۇحامەدياروۆ پەن ولەگ چەرنوۆ قورعاۋدا. بۇگىن ولار ءتوقماديدىڭ وتىنىشىنە بىرنەشە نەگىز بويىنشا قارسىلىق ءبىلدىردى.
2023 جىلدىڭ 22 تامىزىندا جەزقازعان قالالىق سوتى ءتوقماديدىڭ قىلمىستىق كودەكستىڭ 6-بابىن قولدانۋ تۋرالى الدىڭعى ءوتىنىشىن قاراعان. سوت اكتىسىنە سايكەس، سوتتالعانعا قاتىستى مەكەمە ءتۇرى ورتاشا قاۋىپسىزدىك مەكەمەسىنە اۋىستىرىلىپ، 2017 جىلعى 12 ماۋسىم مەن 2018 جىلعى 3 ءساۋىر ارالىعىندا قاماۋدا بولعان ۋاقىتىنداعى 1 كۇندى 1،5 كۇن ەسەبىمەن جازانى وتەۋ مەرزىمى رەتىندە ەسەپتەلگەن. الايدا بۇل سوت اكتىسى 2024 جىلدىڭ 11 قىركۇيەگىندە ۇلىتاۋ وبلىستىق سوتىنىڭ قىلمىستىق ىستەر جونىندەگى سوت القاسىنىڭ قاۋلىسىمەن وزگەرتىلدى. اتالعان قاۋلىدا ءبىرىنشى ساتىداعى سوت شەشىمىنىڭ قاتە ەكەنى كورسەتىلگەن.
“2024 جىلدىڭ 11 قىركۇيەگىندەگى ۇلىتاۋ وبلىستىق سوتى سوت القاسىنىڭ قاۋلىسى وزگەرتىلمەگەن، قايتا قارالماعان جانە ول تۋرالى جوعارى تۇرعان ينستانسياعا شاعىم تۇسپەگەن. قاۋلى كۇشىنە ەنگەن ساتتەن باستاپ قازاقستان رەسپۋبليكاسىنىڭ بۇكىل اۋماعىندا قولدانىستا. دەمەك، ءتوقماديدىڭ ءىسى بويىنشا قىلمىستىق كودەكستىڭ 6-بابىنىڭ نورمالارىن قولدانۋ ماسەلەسى بۇعان دەيىن قارالعان جانە قايتا قاراۋعا جاتپايدى”، — دەدى امانجول مۇحامەدياروۆ.
سۋديا اقمارال مەيىربەكوۆا توكماديدىڭ وتىنىشىنە قاتىستى ءىس جۇرگىزۋدى توقتاتىپ، بۇل ماسەلە بۇعان دەيىن جەزقازعان سوتىندا تولىق قارالعانىن اتاپ ءوتتى.
