BTA Bankiniń negizin qalaýshy Erjan Tátishevti óltirgeni úshin sottalǵan Murathan Toqmádi 2017 jyly qamaýda bolǵan ýaqytyn “bir kún – bir jarym kún” esebimen qaita esepteýdi surap, jazasynyń merzimin qysqartýǵa talpynǵan. Alaida Alataý aýdandyq soty onyń bul ótinishin qanaǵattandyrmady, dep habarlaidy Dalanews.kz.
Osyǵan deiingi sot otyrysynda jáne búgingi otyrysta da Toqmádi men onyń advokaty Kervenov sottan Tátishevter otbasy men olardyń ókilderin protsesten shettetýin surady. Sýdia QR Qylymystyq ákimshilik kodeksiniń 23-babyna sáikes, jábirlenýshilerdiń sot otyryna qatysý quqy baryn rastady. Jábirlenýshi taraptyń quqyqtaryn advokattar Amanjol Muhamediiarov pen Oleg Chernov qorǵaýda. Búgin olar Toqmádidiń ótinishine birneshe negiz boiynsha qarsylyq bildirdi.
2023 jyldyń 22 tamyzynda Jezqazǵan qalalyq soty Toqmádidiń Qylmystyq kodekstiń 6-babyn qoldaný týraly aldyńǵy ótinishin qaraǵan. Sot aktisine sáikes, sottalǵanǵa qatysty mekeme túri ortasha qaýipsizdik mekemesine aýystyrylyp, 2017 jylǵy 12 maýsym men 2018 jylǵy 3 sáýir aralyǵynda qamaýda bolǵan ýaqytyndaǵy 1 kúndi 1,5 kún esebimen jazany óteý merzimi retinde eseptelgen. Alaida bul sot aktisi 2024 jyldyń 11 qyrkúieginde Ulytaý oblystyq sotynyń qylmystyq ister jónindegi sot alqasynyń qaýlysymen ózgertildi. Atalǵan qaýlyda birinshi satydaǵy sot sheshiminiń qate ekeni kórsetilgen.
“2024 jyldyń 11 qyrkúiegindegi Ulytaý oblystyq soty sot alqasynyń qaýlysy ózgertilmegen, qaita qaralmaǵan jáne ol týraly joǵary turǵan instantsiiaǵa shaǵym túspegen. Qaýly kúshine engen sátten bastap Qazaqstan Respýblikasynyń búkil aýmaǵynda qoldanysta. Demek, Toqmádidiń isi boiynsha Qylmystyq kodekstiń 6-babynyń normalaryn qoldaný máselesi buǵan deiin qaralǵan jáne qaita qaraýǵa jatpaidy”, — dedi Amanjol Muhamediiarov.
Sýdia Aqmaral Meiirbekova Tokmadidiń ótinishine qatysty is júrgizýdi toqtatyp, bul másele buǵan deiin Jezqazǵan sotynda tolyq qaralǵanyn atap ótti.
