28 مامىردا قازاقستان ۇكىمەتى تاسقىننان زارداپ شەككەن ازاماتتارعا شىعىندى قالاي وتەپ جاتقانى جونىندە ەسەپ بەردى. ۇكىمەتتىڭ باسپا ءسوز قىزمەتى 30 مىڭنان اسا وتباسى 100 اەك (369 200 تەڭگە) كولەمىندە ءبىر رەتتىك جاردەماقى العانىن جەتكىزدى، دەپ حابارلايدى Dalanews.kz.
تاسقىن سالدارىنان قازاقستاندا شامامەن 12 مىڭنان اسا ءۇيدى جانە 18 مىڭنان اسا ساياجاي قۇرىلىسىن سۋ باسقان، ونىڭ ىشىندە 5353 ءۇي زارداپ شەككەن ادامداردىڭ جالعىز باسپاناسى بولعان.
15 مىڭنان اسا ۇيگە ساراپتاما جاساعان ماماندار 4315 ءۇي اپاتتى جاعدايدا تۇر، ال 9 مىڭنان استام ءۇي قالپىنا كەلتىرۋگە جاتادى دەگەن قورىتىندى جاساعان.
تاسقىننان كەيىن وڭىرلەردە 1847 ءۇي مەن پاتەر قۇرىلىسى باستالعان، بۇدان بولەك، 3417 باسپانا ساتىپ الۋ جوسپاردا بار دەدى ۇكىمەتتىڭ باسپا ءسوز قىزمەتى.
پرەمەر-مينيستر ولجاس بەكتەنوۆ اكىمدىكتەرگە ونەركاسىپ مينيسترلىگىمەن بىرگە وسى اپتانىڭ اياعىنا دەيىن تاسقىن شىعىنىن باعالاۋدى اياقتاۋ جونىندە تاپسىرما بەردى.
بيىل كوكتەمدە قازاقستاننىڭ سولتۇستىگى مەن باتىس وڭىرلەرىن تاسىعان سۋ باسىپ، ميلليونداعان ادام ماتەريالدىق شىعىنعا باتتى. كەي وزەندەردە سۋ تاسقىن كەزىندەگى دەڭگەيمەن بىردەي نەمەسە سوعان جەتەقابىل. ۇيىنەن كەتۋگە ءماجبۇر بولعان 5 مىڭنان اسا ادام ءالى كۇنگە شەيىن ۋاقىتشا پانالاۋ ورتالىقتارىندا تۇرىپ جاتىر.
