الماتى قالاسىنىڭ پروكۋراتۋراسى قالا ورتالىعىنداعى ساياباقتى قايتاردى. بۇل اۋماق يمانعالي تاسماعامبەتوۆ قالا اكىمى بولىپ تۇرعان شاقتا جەكەگە ءوتىپ كەتكەن، - دەپ حابارلايدى Dalanews.kz.
الماتى قالاسىنىڭ پروكۋراتۋراسى مالىمەتىنشە، كوپقاباتتى تۇرعىن ءۇي سالۋ ءۇشىن زاڭدى تۇلعاعا 2،8 گەكتار جەر تەلىمى زاڭسىز بەرىلگەن.
"تالداۋ ناتيجەسىندە 2007 جىلى جەرگىلىكتى اتقارۋشى ورگان الماتى قالاسىنىڭ باس جوسپارىنىڭ ەرەجەلەرىن جانە ەگجەي-تەگجەيلى جوسپارلاۋ جوباسىن ەلەمەي، زاڭدى تۇلعاعا ساياباق ايماعى قاراستىرىلعان ۋچاسكەگە جەكە مەنشىك قۇقىعىن بەرگەن"، - دەپ جازىلعان مالىمەتتە.
كەيىننەن بۇل جەر شامامەن 2،3 ميلليارد تەڭگە وتەماقى تولەنىپ، مەملەكەت مۇقتاجى ءۇشىن تاركىلەندى.
ۋاكىلەتتى ورگان قاداعالاۋ اكتىسىن ورىنداۋ ءۇشىن الماتى قالاسى اكىمىنىڭ قاۋلىسىن جانە ودان كەيىنگى ازاماتتىق-قۇقىقتىق مامىلەلەردى زاڭسىز دەپ تانۋ تۋرالى تالاپ ارىز بەردى.
2024 جىلعى 26 ناۋرىزدا اپەللياسيالىق ساتىداعى سوت تالاپتاردى تولىق قاناعاتتاندىردى.
ايتا كەتەيىك، تاسماعامبەتوۆ 2004-2008 جىلدارى قازاقستاننىڭ ەڭ ءىرى قالاسى الماتىنىڭ اكىمى قىزمەتىن اتقاردى.
