– مەن اكادەميك اسقار جۇمادىلدايەۆ ايتقان پايىممەن تولىق كەلىسەمىن. حالقىمىز وسىنداي كۇردەلى زاماندا ەڭ الدىمەن، الەمگە پراگماتيكالىق كوزبەن قاراۋى كەرەك.
بوس اڭگىمەلەردى توقتاتۋ قاجەت. مىسالى، شىڭعىس حان قاي رۋدان شىقتى دەگەن تالاس-تارتىستى قويۋ كەرەك دەپ ويلايمىن.
قازىرگى تاڭدا زيالى قاۋىمنىڭ كەيبىرى شەتىنەن تاريحشى، شىڭعىستانۋشىلار بولىپ كەتتى. مۇنىڭ قوعامىمىزعا پايدا اكەلەرىنە كۇمانىم بار.
جاستارىمىزدىڭ ساناسى سەرگەك، ەتى ءتىرى، شيراق بولۋى قاجەت.
كورشى مەملەكەتتەردەگى جاس ازاماتتار شەتەلگە بارىپ، كاسىپورىندار، دۇكەندەر اشىپ، جاقسى ءومىر ءسۇرۋ ءۇشىن جاڭا داعدىلاردى يگەرىپ جاتىر.
ولار، شىن مانىندە، باسەكەگە قابىلەتتى، ەڭبەكقور ادامدار. قازىرگى جاعدايدا مەن ءبىر جەردە ءومىر سۇرەمىن، تۋىستارمەن ءومىر بويى بىرگە تۇرامىن دەگەن ۇعىم ابدەن ەسكىرگەن.
سوندىقتان، قۇرمەتتى اعايىن، ءبارىمىز وزىق بولايىق! سوندا عانا جاستارىمىزدىڭ كوزى اشىق، كوكىرەگى وياۋ، ويلارى ۇشقىر بولادى، كوپتەگەن سىن-قاتەرگە توتەپ بەرە الادى. ءوز جاعدايىن وزدەرى جاساپ، جاقسى ءومىر سۇرە الادى، – دەدى مەملەكەت باسشىسى.
