اباي وبلىسىندا بالالاردىڭ قۇقىقتارىن قورعاۋعا باعىتتالعان اۋقىمدى رەفورمالار مەن باستامالار ىسكە اسىرىلۋدا. ەل پرەزيدەنتى قاسىم-جومارت توقايەۆ ءاربىر بالانىڭ باقىتى جانە قاۋىپسىزدىگى ءۇشىن جاعداي جاساۋدىڭ ماڭىزىن اتاپ ءوتتى. وسىعان بايلانىستى بۇگىنگى تاڭدا بالالاردىڭ قۇقىقتارىن قورعاۋعا قاتىستى زاڭنامالىق جانە ستراتەگيالىق شارالار ىسكە اسىرىلۋدا.
بالالار حالقىمىزدىڭ ۇشتەن ءبىرىن ياعني، 6،8 ميلليون ادامدى قۇرايتىندىعىن ەسكەرە وتىرىپ، مەملەكەت ولاردىڭ قۇقىقتارىن قورعاۋعا، ءال-اۋقاتى مەن قاۋىپسىزدىگىن قامتاماسىز ەتۋگە ايتارلىقتاي كۇش سالۋدا. قابىلدانعان ءۇش زاڭ اتا-انا قامقورلىعىنسىز قالعان بالالاردى قوعامعا بەيىمدەۋگە باعىتتالعان.
ماسەلەن، 2024 جىلعى اقپاندا «بالا قۇقىقتارى تۋرالى» زاڭعا جەتىم جانە اتا-انا قامقورلىعىنسىز قالعان بالالارعا ارنالعان تالىمگەرلىك ينستيتۋت ەنگىزۋدى كوزدەيتىن وزگەرىستەر ەنگىزىلدى. اباي وبلىسىندا مۇنداي بالالاردى كاسىبي باعدارلاۋعا، الەۋمەتتەندىرۋگە جانە بوس ۋاقىتىن ۇيىمداستىرۋعا جاردەمدەسەتىن 5 جەكە جانە 7 كورپوراتيۆتىك تالىمگەر كومەك كورسەتەدى.
جەلتوقسان ايىندا «كاسىبي قابىلداۋشى وتباسى» ينستيتۋتىن ەنگىزەتىن زاڭ قابىلداندى. بۇل قيىن ومىرلىك جاعدايعا تاپ بولعان بالالاردى ۇيدە تاربيەلەۋگە مۇمكىندىك بەرەدى. ال كاسىبي اتا-انالارعا ءار بالا ءۇشىن 10 اەك - تەن 70 اەك مولشەرىندە جاردەماقى تولەنەدى.
بالالارعا قاتىستى زورلىق-زومبىلىق ءۇشىن جاۋاپكەرشىلىك كۇشەيتىلدى. ال شۇعىل كومەك كورسەتەتىن «111» بايلانىس ورتالىعىنىڭ جۇمىسى زاڭنامالىق دەڭگەيدە بەكىتىلدى. قىسىم كورسەتۋگە اكىمشىلىك جاۋاپكەرشىلىك ەنگىزىلىپ، بالالاردى قوعامدىق كولىكتەن تۇسىرۋگە تىيىم سالىندى.
2026-2027 وقۋ جىلىنان باستاپ جەكەمەنشىك مەكتەپتەردە وقيتىن حالىقتىڭ الەۋمەتتىك وسال توپتارىنان شىققان بالالارعا تاماق جانە وقۋ قۇرالدارى تەگىن بەرىلە باستايدى. اباي وبلىسىندا قورعانشىلىق جانە قامقورشىلىق بويىنشا 22 مامان جۇمىس ىستەيدى. الايدا قوسىمشا 15 مامان قاجەت.
«2024 جىلدىڭ اقپان ايىنان باستاپ وڭىردە جەتىم جانە اتا-انا قامقورلىعىنسىز قالعان بالالاردى قولداۋعا باعىتتالعان «مەيىرىم» اكسياسى وتكىزىلۋدە. بۇگىنگى تاڭدا 222 بالا مەملەكەتتىك مەكەمەلەر مەن ۇيىمدارعا بەكىتىلىپ، 144 بالانىڭ شوتىنا 37 ملن تەڭگەدەن استام قاراجات اۋدارىلدى»، — دەپ اتاپ ءوتتى اباي وبلىسى اكىمىنىڭ ورىنباسارى جاسۇلان سارسەبايەۆ.
اباي وبلىسىندا بالالاردى قوسىمشا بىلىممەن قامتۋ كورسەتكىشى 92،4% -. قۇرادى. 11 مىڭنان استام بالا ءبىلىم بەرۋ مەكەمەلەرى جانە وزگە دە شىعارماشىلىق ۇيىرمەلەردە، سونداي — اق 6 مىڭنان استام بالا سپورت سەكسيالارىندا ءوز قالاۋلارى بويىنشا اينالىسادى. 309 جالپى ءبىلىم بەرەتىن مەكتەپتەردە وقۋشىلاردى ساباقتان تىس ۋاقىتتا قامتۋ 50 666 وقۋشىنى قۇرادى (49،3%): 1129 ۇيىرمەدە 20773 بالا (20،3%)، 1760 سپورت سەكسيالارىندا 29 893 بالا (29%) قامتىلدى.
اسكەري-پاتريوتتىق تاربيەنى دامىتۋ ءۇشىن وڭىردە 234 كلۋب جانە 59 «جاس سارباز» سىنىپتارى جۇمىس ىستەيدى. ەكولوگيالىق كلۋبتار، سونداي-اق مەكتەپ مۇراجايلارى مەن ولكەتانۋ جاساقتارى بەلسەندى جۇمىس ىستەيدى. 2024 جىلدىڭ جازعى كەزەڭىندە 12 ساۋىقتىرۋ لاگەرى 5 مىڭنان استام بالانى قابىلدادى. قالا سىرتىنداعى لاگەرلەردىڭ جەتىسپەۋشىلىگىن جويۋ ءۇشىن الەۋمەتتىك-ەكونوميكالىق دامۋدىڭ كەشەندى جوسپارى شەڭبەرىندە كەڭگىرباي اۋىلىندا جاڭا لاگەر قۇرىلىسى جۇرگىزىلۋدە.
«ءوڭىردىڭ بارلىق ءبىلىم بەرۋ مەكەمەلەرى بەينەباقىلاۋ كامەرالارى، دابىل تۇيمەلەرى جانە تۋرنيكەت سىندى زاماناۋي قاۋىپسىزدىك جۇيەلەرىمەن جابدىقتالعان. ۇلتتىق بەينەمونيتورينگ جۇيەسىنە قوسىلۋ اياسىندا 23 مىڭنان استام كامەرا ورناتىلدى. وڭىردە وتباسى مەن بالالاردى قولداۋ ورتالىقتارى قۇرىلدى. وندا پسيحولوگتار، الەۋمەتتىك پەداگوگتار جانە قامقورشىلىق ورگاندارىنىڭ قىزمەتكەرلەرى جۇمىس ىستەيدى. قوسىمشا ءبىلىم بەرۋ ءۇشىن اۋىلدىق كلۋبتار مەن مادەنيەت ۇيلەرىن پايدالانۋ ۇيىمداستىرىلدى. 2024 جىلى 113 ءوتىنىش بويىنشا كومەك كورسەتىلىپ، ولاردىڭ ءارقايسىسى جەدەل شەشىلدى»، — دەپ تولىقتىردى وبلىس اكىمىنىڭ ورىنباسارى.
ايماقتا ءبىر جىلدا بۋللينگ، ناشاقورلىقتىڭ جانە ەكسترەميزمنىڭ الدىن الۋ بويىنشا مىڭنان استام ءىس-شارالار وتكىزىلدى. 2024 جىلدىڭ تامىز ايىندا وبلىس ماماندارى ءۇشىن بالالاردىڭ قۇقىقتارىن قورعاۋ ماسەلەلەرىنە ارنالعان وقىتۋ سەمينارى ۇيىمداستىرىلدى.
ءبىر سوزبەن ايتقاندا، اباي وبلىسىندا ءار بالاعا قولايلى جاعداي جاساۋ بويىنشا جۇمىس جالعاسۋدا.
