رەسەي فەدەراسياسى ارمەنيا حالقىن ۇكىمەتتى قۇلاتۋعا شاقىرعان. بۇل تۋرالى ارمەنيا پرەمەر-مينيسترى نيكول پاشينيان France 24 تەلەارناسىنا بەرگەن سۇحباتىندا مالىمدەدى، دەپ حابارلايدى Dalanews.kz.
"بىرنەشە اي بۇرىن رەسەي ارميان حالقىن اشىق تۇردە بيلىكتى قۇلاتۋعا شاقىردى. بۇعان بايلانىستى ماسكەۋدىڭ جۇرگىزىپ جاتقان ۇگىت-ناسيحاتى ءالى دە جالعاسۋدا. مەنى ارمەنياداعى رەسەيلىك دەزەرتير دميتريي سەتراكوۆتى رەسەيلىك ساربازداردىڭ ۇرلاپ اكەتكەنى قاتتى الاڭداتادى. ءبىز ءوز اۋماعىمىزعا باعىتتالعان زاڭسىز ارەكەتتەرگە شىداي المايمىز. ەگەر ەريەۆاننىڭ تالاپتارى جاۋاپسىز قالسا، ونىڭ مىندەتتى تۇردە سالدارى بولادى. ارمەنيانىڭ ماسكەۋ باسقاراتىن ۇقشۇ-عا قاتىسۋى توقتاتىلدى"، - دەدى پاشينيان.
ەسكە سالايىق، بۇعان دەيىن ارمەنيا پرەمەر-مينيسترى نيكول پاشينيان ەريەۆاننىڭ ۇقشۇ-عا مۇشەلىگىن توقتاتقانىن مالىمدەگەن بولاتىن. France 24 تەلەارناسىنا بەرگەن سۇحباتىندا ول ارمەنياعا قاتىستى ۇجىمدىق قاۋىپسىزدىك تۋرالى شارت ورىندالماعانىن اتاپ ءوتتى.
"ءبىزدىڭ ويىمىزشا، ارمەنياعا قاتىستى ۇجىمدىق قاۋىپسىزدىك تۋرالى شارت، اسىرەسە، 2021-2022 جىلدارى ورىندالمادى. بۇل ماسەلە ءبىزدىڭ نازارىمىزدان تىس قالمادى. ءبىز وسى شارتقا قاتىسۋدى توقتاتتىق. ارى قاراي نە بولاتىنىن كورەيىك"، - دەدى پاشينيان سۇحباتىندا.
