ەكىباستۇز قالاسىنا جۇمىس ساپارىمەن بارعان مەملەكەت باسشىسى مونوقالالاردى دامىتۋ جونىندەگى كەڭەستە ازىق-تۇلىك باعاسىنا توقتالدى.
پرەزيدەنتتىڭ ايتۋىنشا، بيىل الەۋمەتتىك ماڭىزى بار ازىق-تۇلىك باعاسى 10،4%-كە وسكەن. 9 ايدىڭ قورىتىندىسى بويىنشا ينفلياسيانىڭ جالپى ءوسىمى 8،9%ء-تى قۇرادى.
"... مەنىڭ تاپسىرماممەن دەلدالدىق سحەمالاردى تەرگەۋ بويىنشا وڭىرلىك كوميسسيالار قۇرىلدى. الايدا ناتيجەنى پرەزيدەنت تە، ازاماتتار دا كورىپ تۇرعان جوق. پرەزيدەنت اكىمشىلىگى ءمان-جايدى انىقتاپ، ءبىر اپتا ىشىندە ەسەپ بەرۋگە ءتيىس"، - دەدى توقايەۆ.
ول ازىق-تۇلىك باعاسىنىڭ قىسىمىمەن ينفلياسيا 6%-تەن اسىپ كەتكەنى ايقىن ەكەنىن ايتتى. پرەزيدەنت ۇكىمەت پەن ۇلتتىق بانككە ينفلياسيانى 8،5% شەگىندە ساقتاۋدى تاپسىردى.
بۇدان بولەك پرەزيدەنت سىبايلاس جەمقورلىققا قارسى قىزمەتكە اۋىل شارۋاشىلىعىن سۋبسيديالاۋعا بولىنگەن قاراجاتتىڭ جۇمسالۋىنا ساراپتاما جاساۋدى بۇيىردى.
"اۋىل شارۋاشىلىعىن سۋبسيديالاۋ جايىندا. سوڭعى 5 جىلدا بۇل ماقساتقا 2 ترلن تەڭگەدەن استام قاراجات ءبولىندى. ناتيجەسىندە نە بولدى؟ بيۋدجەت قاراجاتى جۇمسالادى، ونىڭ جۇمسالۋىنا ءبىرىڭعاي باقىلاۋ جوق. ايتارلىقتاي ەكونوميكالىق تيىمدىلىگى دە جوق"، - دەدى قاسىم-جومارت توقايەۆ ەكىباستۇزدا ءوتىپ جاتقان مونوقالالاردى دامىتۋ ماسەلەلەرىنە ارنالعان جينالىستا.
پرەزيدەنت جەمقورلىققا قارسى قىزمەتكە بۇل سالاعا ساراپتاما جۇرگىزۋدى تاپسىرعان.
"سىبايلاس جەمقورلىققا قارسى قىزمەتكە پروكۋراتۋرامەن جانە باسقا دا ورگاندارمەن بىرگە بۇل سالاعا كەشەندى ساراپتاما جاساۋدى تاپسىردىم. وعان قوعامدى جانە اگرارييلەردىڭ وزدەرىن دە تارتۋ كەرەك"، - دەدى مەملەكەت باسشىسى.
