ىشكى ىستەر ءمينيسترىنىڭ بۇرىنعى ورىنباسارى ايدوس رىسبايەۆ كولىكتەگى پوليسيا دەپارتامەنتىنىڭ باستىعى بولىپ تاعايىندالدى، دەپ حابارلايدى Dalanews.kz.
بۇل تۋرالى ءىىم مالىمدەدى.
“پرەزيدەنت اكىمشىلىگىمەن جانە ىشكى ىستەر ءمينيسترىنىڭ بۇيرىعىمەن كەلىسىم بويىنشا كولىكتەگى پوليسيا دەپارتامەنتىنىڭ باستىعى بولىپ پوليسيا گەنەرال-مايورى ايدوس رىسبايەۆ تاعايىندالدى”، - دەلىنگەن حابارلامادا.
ايتا كەتەيىك، تالعارداعى تراگەديادان كەيىن مەملەكەت باسشىسىنىڭ وكىمىمەن ايدوس رىسبايەۆ ىشكى ىستەر ءمينيسترىنىڭ ورىنباسارى لاۋازىمىنان بوساتىلعان ەدى.
ەسكە سالايىق، 4 قازاندا تالعاردا ءبىر توپ بۇزاقىنىڭ قولىنان 16 جاستاعى شەرزات بولات قايتىس بولدى. قايعىلى وقيعادان كەيىن الماتى وبلىسىندا ءبىرقاتار جوعارى لاۋازىمدى پوليسەي قىزمەتىنەن كەتتى.
ونىڭ قاتارىندا الماتى وبلىسى پروكۋرورىنىڭ ورىنباسارى مەن تالعار اۋدانىنىڭ پروكۋرورى دا بار.
سونىمەن قاتار تالعار اۋدانى اكىمى اپپاراتىنىڭ باسشىسى، حاسان قاسىمبايەۆتىڭ اعاسى اسلان قاسىمبايەۆ قىزمەتىنەن كەتتى.
ال پوليسيا قىزمەتى باسقارماسىنىڭ باستىعى لاۋازىمىنا ابدۋنۋر تاسىبايەۆ جانە ۇيىمداسقان قىلمىسقا قارسى كۇرەس باسقارماسىنىڭ باستىعىنا بايجان ساتىلعانوۆ تاعايىندالدى. مەيرام ابىكەيەۆ الماتى وبلىسى پوليسيا دەپارتامەنتىنىڭ باستىعى بولدى.
