مەرەكەلىك شاراعا اۋىل ادامدارى، زيالى قاۋىم وكىلدەرى، الىس-جاقىننان كەلگەن قوناقتار مەن قىزاي انا ۇرپاقتارى قاتىناستى. اق جاۋلىقتى انالار شاشۋ شاشقاننان كەيىن، مەرەكەلىك شارا قاراجورعا بيىمەن باستالدى. اقساقالدار باتا بەرىپ، اۋىل، اۋدان اكىمدەرى مەن قور مۇشەلەرى، زيالى قاۋىم وكىلدەرى حالىقتى ناۋرىز مەرەكەسىمەن قۇتتىقتاپ، اق جارما تىلەكتەرىن جاۋدىردى.
«قىزاي انا» قوعامدىق قورىنىڭ ءتوراعاسى ءنابيجان مۇقامەتحان ۇلى قوردىڭ ماقساتى ەلباسىنىڭ اۋىل باعدارلاماسىن قولداۋ رەتىندە وسى وستەمىر اۋىلىنىڭ الەۋمەتتىك-مادەني دامۋىنا ۇلەس قوسۋ. اۋىل حالقىنا جانە كەلگەن قوناقتارعا مەرەكەلىك كوڭىل كۇي سىيلاۋ ەكەنىن ايتىپ، شاراعا اتسالىسقان بارشا ازاماتتارعا العىسىن ءبىلدىردى جانە قوردى قولداۋعا شاقىردى.
2011 جىلى «قىزاي انا» قورى قۇرىلعاننان بەرى وستەمىر اۋىلىندا ناۋرىز مەرەكەسىن وتكىزىپ كەلەدى. قوردىڭ ءداستۇرى بويىنشا جىل سايىن ناۋرىز مەركەسىن وتكىزۋ جاۋاپكەرشىلىگىن ءبىر نەمەسە بىرنەشە ازامات ءوز مويىنىنا الىپ، بارلىق شىعىنداردى وزدەرى كوتەرىپ، مەرەكە كەزىندە ءتۇرلى الەۋمەتتىك شارالاردى دا وتكىزەدى. بيىلعى جىلعى ناۋرىز مەرەكەسىن وتكىزۋ جاۋاپكەرشىلىگىن بەلگىلى كاسىپكەر نۇرتاي نۇرساپا ۇلى العان ەدى.
«قىزاي انا» قوعامدىق قورى جاستاردى ءبىلىم مەن عىلىمعا ىنتالاندىرۋ ءۇشىن ستۋدەنتتەرگە ارنالعان ءبىر رەتكى ستيپەندياعا كونكۋرس جاريالاعان. جوو وقىتۋشىلارى مەن قوردىڭ باسشىلارىنان قۇرالعان قازىلار القاسى كەلىپ تۇسكەن وتىنشتەردى قاراپ، وقۋ ۇلگەرىمى جاقسى، وتباسىندا قيىنشىلىعى بار 20 ستۋدەنتكە ءبىر رەتكە ستيپەنديا تاعايىنداعان بولاتىن. 21 ناۋرىزداعى مەرەكەلىك شارا اياسىندا وسى ستۋدەنتتەردىڭ دە ستيپەندياسى تابىس ەتىلدى. قور اتىنان تاعايىندالعان بۇل ستيپەنديانىڭ قارجىسىن دا بيىلعى ناۋرىز مەرەكەسىن وتكىزگەن ازامات شىعاردى.
«قىزاي انا» قوعامدىق قورى جىل سايىن نارۋىز مەرەكەسىندە ستۋدەنتتەرگە ستيپەنديا تاعايىنداپ كەلەدى. جىلدا 5 ستۋدەنتكە ستيپەنديا تاعايىنداسا، بيىلعى جىلدى جاستار جىلى دەپ بەلگىلەۋىنە بايلانىستى ستيپەنديا يەگەرلەرىنىڭ سانىن 20-عا كوبەيتتى. سونىمەن بىرگە، بيىل كوپ بالالى انالارعا دا كومەك جاسالدى. وستەمىر، تۋعانباي، بايدىبەك، نۇرا اۋىلىنداعى وتباسىندا قيىنشىلىعى بار، كوپ بالالى 5 اناعا قارجىلاي سىيىلىق بەرىلدى. بۇل كوپبالالى انالاردىڭ ءتىزىمىن تالعار اۋداندىق ءماسليحاتىنىڭ دەپۋتاتى ءابدىعاني ءبازىلحان ۇلى «قىزاي انا» قورىنىڭ باسشىلارىنا ۇسىنعان ەدى.
بىرنەشە جىلدان بەرى «قىزاي انا» قوعامدىق قورىنىڭ حاتشىسى ءومارالى ادىلبەك ۇلى تالعار اۋدانى وستەمىر اۋىلى №14 مەكتەپتىڭ وقۋدا وزات، وتباسىندا قيىنشىلىعى 5 بالاعا قارجىلاي سىيلىق بەرىپ كەلە جاتقان، بيىلعى جىلى بۇل يگى ءىستى قوردىڭ قۇرىلتايشىلارىنىڭ ءبىرى ءتۇسىنالى تىلەۋشە جالعاستىردى. بۇل وقۋشىلاردىڭ ءتىزىمىن جىلدا اتالمىش مەكتەپتىڭ ديرەكتورى مەن مۇعالىمدەرى بەرەدى.
ق ر سۋرەتشىلەر وداعىنىڭ مۇشەسى شاتتىق باتاننىڭ ۇيىمداستىرۋىمەن 5- سىنىپقا دەيىنگى مەكتەپ وقۋشىلارىنا انرالعان سۋرەت ونەرىنەن ماستەر-كلاسس جانە "نارۋىزىم مەرەكەم" اتتى مەكتەپ وقۋشىلارى اراسىندا سۋرەت سىزۋ كونكۋرسى ءوتىپ، جەڭىمپازدار سەرتيفيكات جانە سىيلىقتارمەن ماراپاتتالادى. بۇل سىيلىقتاردى بەلگىلى كاسىپكەر ازامات ەرلان داۋەلتبەك توققازى اۋلەتى اتىنان اكەلىپ، ستيپەنديا يەگەرى بولعان ستۋدەنتتەر مەن سۋرەت سىزۋ كونۋرسىنا قاتىسقان بالالارعا بەردى.
"ەلمۇرا" كومپانياسى ۇلتتىق قولونەر بۇيىمدارى كورگىزبەسىن وتكىزسە، اق قالپاقتى اتالار مەن كيمەشەك كيگەن اجەلەرىمىز ەرەشە سانىمەن مەرەكەگە كورىك قوستى، ۇلتتىق بوياۋىمىزدى جاس ۇرپاققا تانىتقانداي بولدى.
اۋىلدا مەرەكەگە ارناپ اقبوز ۇيلەر تىگىلىپ، جيلعان قۋىمعا ناۋرىز كوجە بەرىلەدى. داستارحان باسىندا ناۋرىزعا ارناپ سويىلعان مالدىڭ كارجىلىگىن كەلەسى جىلعى ناۋرىزدى وتكىزەتىن ازاماتتارعا ۇستاتىپ، ءداستۇرلى جاۋاپكەرشىلىكتى جۇكتەدى. «قىزاي انا» قورىنىڭ اتقارۋشى ديرەكتورى ءبازارالى ءارىپ ۇلى بيىلعى ناۋرىزدى وتكىزگەن ازاماتتارعا العىسىن ءبىلدىرىپ، كەلەسى جىلعى ناۋرىزدى وتكىزەر ازاماتتارعا كەلەسى جىلعى ناۋرىزدىڭ دا ءمان-ماعىنالى وتۋىنە بىرگە اتسالىساتىندارىن جەتكىزدى. 3 ساعاتقا سوزىلعان كونسەرتتىك باعدارلاما اياسىندا بەلگىلى ونەر قايراتكەرلەرى ءان مەن كۇيدەن شاشۋ شاشتى.
مەرەكەلىك شارا ايااسىندا ارقان تارتۋ، قول كۇرەس، كىر كوتەرۋ سياقتى ءتۇرلى سپورتتىق جارىستار ءوتتى. سونىمەن بىرگە جاسوسپىرىمدەر اراسىندا قازاق كۇرەسىنەن چەمپيونات ءوتىپ، جەڭىمپازدى «قوڭىرباي پالۋان» اتىنداعى تۇيە پالۋان اتاعىمەن ماراپاتتاپ، باعالى سىيلىقتار بەردى.
قوڭىرباي باينازار ۇلى بيىلعى جىلعى ناۋرىز مەرەكەسىن وتكىزگەن اتىمتاي جومارت نۇرتاي نۇرساپا ۇلىنىڭ ارعى اتاسى. قوڭىرباي باينازار ۇلى جاۋرىنى جەرگە تيمەگەن پالۋان ءارى ەلى مەن جەرىن قورعاعان ەر جۇرەك باتىر. 18 عاسىرداعى قازاق دالاسىن جۇڭعار شاپقىنشىلارىنان قورقاۋ جورىقتارىندا ەسەنگەلدى بيمەن بىرگە قىزاي ەلىنىڭ قولىن باستاپ، ابىلايدىڭ اقتۋىنىڭ استىندا حان باتىر قابانبايدىڭ ارتىنان ەرىپ، حالقىن جاۋدان قورعاعان. باتىر تۋرالى ماقالالار الداعى ۋاقتتى اقپارات قۇرالدارىندا جاريالانار. ال بۇگىنگى مەرەكەلىك شارانى ۇيىمداستىرعان باتىردىڭ ۇرپاعىنىڭ جومارتىعى، جاساعان يگى شارالارى، ءبىلىمدى ۇرپاقتاردى ماراپاتتاۋى بەيبىت كۇندەگى باتىرلىق بولىپ تابىلارى انىق.
تۇردىبەك قۇرمەتحان
دەرەككوز: Jebeu.kz
