ءبىر عانا تالعار اۋدانىنىڭ وزىندە بەس بىردەي ءبىلىم شاڭىراعى بوي كوتەرىپ، جاڭا وقۋ جىلى قارساڭىندا پايدالانۋعا بەرىلگەن.
ايتالىق، «نۇرلى جول» باعدارلاماسى اياسىندا تالعار اۋدانىنىڭ اقتاس اۋىلىندا №36 ورتا مەكتەپكە جانە بەلبۇلاق اۋىلىنداعى №32 ءبىلىم شاڭىراعىنا 600 ورىندىق عيمارات جاپسارلاي سالىنىپ، وقۋشىلاردى قابىلدادى. بۇل ماقساتقا 2 ملرد 374 ملن تەڭگە قارجى بولىنگەن.
سونىمەن قاتار ەلامان، كىشى بايسەركە، ەڭبەكشى ەلدى مەكەندەرىندە 300 ورىندىق جاڭا مەكتەپتەر قولدانىسقا ءوتتى. تالعار اۋدانىندا حالىق سانى كوپ بولعاندىقتان، الداعى ۋاقىتتا تاعى دا جاڭا مەكتەپتەر سالۋ جوسپاردا بار. ايتا كەتەرلىگى، اۋداننىڭ بارلىق مەكتەبى ينتەرنەتپەن قامتىلعان.
تالعار اۋدانىنىڭ 2017 جىلى ءبىلىم سالاسىنىڭ بيۋدجەتى 10 ملرد 153 ملن تەڭگەگە جەتتى. بۇل قارجى اۋدان بيۋدجەتىنىڭ 72 پايىزىن قۇرايدى.
بۇگىنگى كۇنى اۋداندا 67 بالاباقشا جۇمىس جاسايدى، ونىڭ ىشىندە 6 مەملەكەتتىك، 61 جەكەمەنشىك بالاباقشا بار. 58 بالاباقشا - «بالاپان» باعدارلاماسىنا ەنگىزىلگەن. جەكەمەنشىك بالاباقشالار اۋدان كولەمىندە سوڭعى بىرنەشە جىلدان بەرى كوبەيە ءتۇستى. 2016 جىلدان باستاپ اۋداندا 1795 ورىندىق 30 جەكەمەنشىك بالاباقشا ىسكە قوسىلسا، 2017 جىلدىڭ ءى جارتىجىلدىعىندا 200 ورىندىك 2 جەكەمەنشىك بالاباقشا اشىلادى. جىل سوڭىنا دەيىن تاعى 200 ورىنعا جاڭا بالاباقشا اشىپ، مەكتەپكە دەيىنگى بالالاردى قامتۋ پايىزىن 95 پايىزعا كوتەرۋ كوزدەلىپ وتىر.
باقتيار قاباس،
الماتى وبلىسى
