اۋەلى وبلىستىق م.تولەبايەۆ اتىنداعى ۇلت-اسپاپتار وركەسترى ءالي الپىسبايەۆتىڭ «ەلگە ارناۋ» تۋىندىسىن ورىنداپ، كەش شىمىلدىعىن ايقارا اشسا، ءسوز العان ءادىلقازىلار القاسىنىڭ ءتوراعاسى سەرىك جەكسەمبەك ۇلى ەكى نوميناسيا بويىنشا وتكەن بايقاۋعا 48 ءوتىنىم ءتۇسىپ، ونىڭ 18ء-ى اقتىق سىنعا جولداما العانىن اتاپ ءوتتى. سونىمەن قاتار، ءى رەسپۋبليكالىق بايقاۋدىڭ جەر جانناتى جەتىسۋ تورىندە، كەشەگى م.تولەبايەۆتاي دارىندى كومپوزيتور تۋعان توپىراقتا وتكەنى زاڭدىلىق دەپ مالىمدەپ، وبلىس اكىمدىگىنە دەگەن جۇرەكجاردى لەبىزىن جەتكىزدى. وعان قوسا، وركەستر جانە انسامبلدەرگە ارنالعان ۇلكەن جانە كىشى مۋزىكالىق شىعارمالار، «ەڭ ۇزدىك ءان» نوميناسيالارى بويىنشا جۇلدەلى 1-ورىندى جەڭىپ العان اتىراۋلىق باقىتبەك سارتبايەۆ، استانالىق ءالىبي ابدينۋروۆ پەن ارمان جايىمدى سالتاناتتى تۇردە ماراپاتتادى. وسىمەن بىرگە، «ەڭ ۇزدىك سالتاناتتى شىعارما» نوميناسياسى بويىنشا 2-ورىن يەگەرى اتانعان تالدىقورعاندىق ءالي الپىسبايەۆ پەن استانالىق بالنۇر قىدىربەكوۆانى دا ماراپاتتاپ ءوتتى.
ءوز كەزەگىندە كومپوزيتور بەيبىت ورال ۇلى مەن ايبوز اقىن امىرە ءارىن «ەڭ ۇزدىك ءان» نوميناسياسى بويىنشا جۇلدەلى ورىن العاندار مەن ديپلومانتتارعا جۇلدەسىن تابىس ەتتى. اتاپ ايتساق، الماتى وبلىسىنان جانعازى جەكسەمبايەۆ پەن قىزىلوردالىق ساۋەن ءالىش 2-ورىن، تالدىقورعاندىق سەرىكجامال اجىبەكوۆا 3-ورىن يەگەرى دەپ تانىلسا، استانالىق مارات وماروۆ ديپلومانت اتاندى. ال ءوز كەزەگىندە قازىلار القاسىنىڭ مۇشەسى ەرمۇرات ۇسەنوۆ پەن التىناي بالتاتەگى «حالىق اسپاپتار وركەسترىنە نەمەسە ەسترادا-سيمفونيالىق وركەسترىنە جازىلعان ەڭ ۇزدىك سالتاناتتى شىعارما» نوميناسياسى بويىنشا 3-ورىن يەگەرى اتانعان استانالىق نۇرلان
بەكەنوۆ پەن ورالدىق ەركىن نۇرىمبەتوۆتى جانە ارنايى ديپلومعا يە بولعان استانالىق شولپان قورعانبەك پەن سەرىكجان ابدينۋروۆتى، الماتىلىق ارتىق توقسانبايەۆ پەن حابيبۋللا سەتەكوۆتى جانە تالدىقورعاندىق مارات بەردىعۇلوۆتى ارنايى ماراپاتتادى.
وبلىس كولەمىندە تۇڭعىش رەت ۇيىمداستىرىلعان بايقاۋدىڭ جەڭىمپازدارىن ماراپاتتاۋ راسىمىنەن كەيىن وبلىستىق م.تولەبايەۆ اتىنداعى ۇلت-اسپاپتار وركەسترىنىڭ سۇيەمەلدەۋىمەن ومىرگە كەلگەن تىڭ شىعارمالار ورىندالىپ، قازاق مۋزىكا ونەرى كورەرمەندەردىڭ كوڭىلىن كوكجيەكپەن استاستىردى.
