ءقازىر كۋرەرلىك مەن تاكسيشىلىق حالىقتىڭ نەگىزىگى كاسىبىنە اينالعانى جاسىرىن ەمەس. مۇنى كۇنى كەشە عانا ق ر پارلامەنتى قابىرعاسىندا جۋرناليستەردىڭ سۇراعىنا جاۋاپ بەرگەن ق ر قورعانىس ۆيسە-مينيسترى سۇلتان كامەلەتيدەنوۆ تە مويىندادى، – دەپ حابارلايدى Dalanews.kz.
اسكەري قىزمەتشىلەردىڭ جاعدايى جايىندا سۇراعان ارىپتەسىمىز "ءبىراز اسكەري قىزمەتشىلەر جۇمىستان كەيىن جەكە كولىكتەرىمەن تاكسيشىلىق قىزمەت اتقاراتىنىن بىلەمىز. سوندا ولار قاي ۋاقىتتا دەمالادى؟" دەگەن سۇراققا ۆيسە-مينيستر قاشپاي تۋرا جاۋاپ بەردى.
– بۇل ماسەلە جايىندا كەسىمدى پىكىر ايتا المايمىن. ءبىزدىڭ مينيسترلىك ۇكىمەت بەكىتكەن قارجى بويىنشا اسكەري قىزمەتشىلەرگە اقى تولەيدى. ءيا، كەز كەلگەن اسكەري قىزمەتشى جۇمىستان شىققاننان كەيىن دەمالۋى كەرەك. وكىنىشكە وراي، اسكەريلەر قىزمەتى اياقتالعاننان كەيىن تاكسيشىلىق اينالىساتىنىن بىلەمىن. بۇل ءقازىر جالپىۇلتتىق ماسەلە بولىپ تۇر، – دەپ كامەلەتيدەنوۆ مىرزا كوكەيدەگى وي-پىكىرىن ىرىكپەي ايتتى.
راس، ۆيسە-مينيستردىڭ ويىن ىرىكپەي ايتقانىنا ريزا بولدىق.
ءقازىر جالعىز اسكەري قىزمەتشىلەر عانا ەمەس، ۇستازدار مەن مەملەكەتتىك قىزمەتشىلەر دە نەگىزگى قىزمەتىنەن قولى بوساعاندا رۋلگە جارماسىپ، تاكسيشىلىقپەن اينالىساتىنى ءبارىمىز بىلەمىز. ارينە، جۇرت ەشكىم جەتىسكەننەن تاكسي بولىپ جۇرمەگەنى انىق.
ەگەر پرەمەر ءاليحان سمايلوۆ ياندەك تاكسيدىڭ بازاسىنا ۇڭىلسە، تاكسيشىلەردىڭ ءبىرازى ءوزىنىڭ ارىپتەستەرى ەكەنىن بايقاعان بولار ەدى.
سوندىقتان تۋرا سۇراققا تۋرا جاۋاپ قايىرعان قورعانىس ۆيسە-مينيسترى سۇلتان كامەلەتيدەنوۆكە ريزامىز.
كەزىندە اتامىز حالىقتىڭ تۇرمىسىن تۇزەۋدى ەكى سيىرمەن بايلانىستىرى ەمەس پە؟ ال مۇنىڭ جانىندا تاكسيشىلىعىڭىز ءتاپ-تاۋىر كاسىپ قوي.
ايتپاقشى، ءبىز ايتپاساق تا، ۇكىمەت كولىگى بار مەمقىزمەتكەرلەردىڭ تاكسيشىلىقپەن اينالىسىپ جۇرگەنىن جاقسى بىلەتىن سياقتى.
جىل باسىندا قارجى ۆيسە-مينيسترى ەرجان ءبىرىمجانوۆ الداعى ۋاقىتتا تاكسيست پەن كۋرەرلەردىڭ جۇمىسىن سالىق سالاتىن جاڭا رەجيم پايدا ايتىپ، ءسۇيىنشى سۇرادى. ۇكىمەت بيۋدجەتتىڭ ءبۇيىرىن شىعارۋدا تاكسيشىلىق پەن كۋرەرلىكتى مۇنايدان كەيىنگى ەكىنشى ورىنعا قويسا كەرەك.
وليگارحتارعا ازۋى باتپاعان قارجى مينيسترلىگى ەندى تاكسيست پەن كۋرەرلەرگە قارسى "وحوتانى" باستاپ كەتكەندەي. جاقىن كۇندەرى ياندەكس تاكسي قوسىمشاسى جۇزدەگەن مىڭ تاكسيستەردى قويداي كوگەندەپ، ۇكىمەتكە ۇستاپ بەرسە، تاڭقالماڭىز.
