تارازدا كوروناۆيرۋسقا شالدىققاندار تۇسەتىن ستاسيوناردا تۇنىمەن جىلۋ بولماي، ناۋقاستار توڭىپ شىققان. كەيبىرى سۋىقتان اۋرۋىن اسقىندىرىپ الىپتى. ونىڭ ىشىندە قالالىق ءماسليحات دەپۋتاتى دا بار. باسىنا كۇن تۋعان حالىق قالاۋلىسىنىڭ ءوزى دە الەۋمەتتىك جەلىنىڭ كومەگىمەن بيلىككە شاعىندى، دەپ حابارلايدى Dalanews.kz كتك تەلەارناسىنا سىلتەمە جاساپ.

- مىنە، نۇرلان شاتحان ۇلى، ەكىنشى قاباتتا نە بولىپ جاتقانىن كوردىڭىز بە؟ بالكىم بىلمەيتىن شىعارسىز. سۋ تامشىلاپ جاتىر.

ءقاۋىپتى ىندەتكە شالدىققان دەپۋتات ەلميرا مىرزا-عالي ءبىراز ۋاقىتتان بەرى ينفەكسيالىق ستاسيوناردا ەم الىپ جاتىر. ونىڭ سوزىنشە، عيماراتتىڭ كىرە بەرىسىنەن ەرىگەن قار سۋى سورعالاپ اعىپ تۇر. مەكەمەنىڭ ءىشى سۋىق، كرانداعى سۋ سالقىن، ول ازداي، تۇنىمەن جىلۋ بولماعان.

سونىڭ كەسىرىنەن ناۋقاستاردىڭ ءبارى جاۋراپ، كوبىسىنىڭ تەمپەراتۋراسى كوتەرەلىپ، جوتەلى اسقىنعان. مۇنداي باسسىزدىققا ابدەن ىزا بولعان حالىق قالاۋلىسى ىشتەگى قولايسىز جاعدايدى تاسپاعا ءتۇسىرىپ، تۇندە الەۋمەتتىك جەلىدە جاريالاعان. ال ەرتەڭىندە دەرەۋ جىلۋ قوسىلدى.

دەپۋتات كامەراعا ءمان-جايدى ايتۋدان باس تارتتى. ونىڭ ايتۋىنشا، دەنساۋلىعى ناشارلاپ، باس كوتەرە الماي جاتىر.

ەربول وردابەكوۆ، تاراز قالاسى №1 اۋرۋحاناسى باس دارىگەرىنىڭ ورىنباسارى:

قازاندىقتان اقاۋ شىقتى. بۇل ءبىزدىڭ قولىمىزداعى شارۋا ەمەس، وان جىلۋ مەكەمەسى جاۋاپتى. ولار بۇگىن تاڭەرتەڭ كەلىپ جوندەپ بەردى. ءبىز سول مەكەمەگە نارىزىلىعىمىزدى ءبىلدىرىپ، حات جازعالى وتىرمىز. دايىنداپ تا قويدىق. ناۋقاستار جىلۋسىز قالماۋى ءتيىس.