ماڭعىستاۋ وبلىسىنىڭ ورتالىعىنا جاقىن ورنالاسقان شەتپە اۋىلى نوسەر جاڭبىردىڭ كەسىرىنەن سۋعا باتىپ جاتىر.
بىرنەشە ساعات بويى تولاسسىز جاۋعان جاۋىننان كەيىن ەلدى مەكەن كوشەلەرىن لاي سۋ باسىپ، اۋىل تۇرعىندارى بالشىقتان بەلۋارعا دەيىن باتۋعا ءماجبۇر بولعان، دەپ حابارلايدى Dalanews.kz.
جەرگىلىكتى جۇرتتىڭ ايتۋىنشا، جاڭبىردىڭ سالدارىنان اۋىل ىشىندەگى جولداردى شايىپ، كوشەلەردى قۋالاي اققان لاي سۋ ۇيلەردىڭ اۋلاسىن، كولىك تۇراعىن دا اياماي باسقان. اسىرەسە، اۋىلدىڭ تەمىرجول بويىندا ورنالاسقان ايماقتارى قاتتى زارداپ شەككەن.
الەۋمەتتىك جەلىلەردە تاراعان ۆيدەولاردان شەتپە تۇرعىندارىنىڭ كولىكتەرىن لايدان شىعارا الماي اۋرەگە ءتۇسىپ جاتقانىن كورۋگە بولادى.
«اۋىل تۇگەلىمەن سۋدا قالدى. بالشىققا باتىپ، كوشەدە ءجۇرۋ مۇمكىن ەمەس. توبەدەن قۇيىلعان سۋدان قاشىپ ۇلگەرمەدىك»، – دەيدى جەرگىلىكتى تۇرعىندار.
ازىرگە رەسمي ورگاندار بۇل جاعدايعا قاتىستى تۇسىنىكتەمە بەرمەگەن. تۇرعىندار قۇتقارۋشىلاردىڭ ارەكەتسىزدىگىنە نارازى.
ايتا كەتەيىك، «قازگيدرومەت» ماماندارى 27 شىلدە كۇنى ماڭعىستاۋ وبلىسىنىڭ سولتۇستىك، ورتالىق جانە باتىس بولىكتەرىندە كۇن كۇركىرەپ، جاڭبىر جاۋاتىنىن الدىن الا ەسكەرتكەن بولاتىن. سينوپتيكتەردىڭ حابارلاۋىنشا، 28 شىلدەدە دە وبلىستىڭ سولتۇستىك-باتىس اۋماعىندا جاۋىن-شاشىن ساقتالادى.
ال نوسەر جاڭبىر سالدارىنان اۋىلداعى تەمىرجول ماڭىندا سۋ اعىپ، كولىك جولدارىن دا شايىپ كەتكەن.
وسى ماسەلەگە قاتىستى «قازاقستان تەمىر جولى» كومپانياسى رەسمي مالىمدەمە جاسادى:
«تەمىرجول بويىنا جاقىن جەردە تاسقىن سۋ جۇرگەنىمەن، تەمىرجولدىڭ ءوزى امان. رەلستەردى شايىپ كەتۋ ءقاۋپى جوق. ءقازىر بۇل اۋماقتا جول جوندەۋشى بريگادالار مەن ارنايى تەحنيكا كۇندىز-تۇنى كەزەكشىلىك اتقارۋدا. ۋاقىتشا ەسكەرتۋ بەلگىلەرى قويىلىپ، قاۋىپسىزدىك شارالارى كۇشەيتىلگەن. جولاۋشىلار مەن جۇك تاسىمالداۋشى پويىزداردىڭ قوزعالىسى قالىپتى، ەشقانداي كىدىرىس جوق»، – دەلىنگەن حابارلامادا.
جاۋىننان زارداپ شەككەن اۋىل تۇرعىندارى ازىرگە كومەك كەلمەگەنىن ايتىپ، جەرگىلىكتى بيلىكتىڭ ارەكەت ەتۋىن تالاپ ەتۋدە. تۇرعىندارعا ساق بولۋ جانە شالعاي جولدارعا شىقپاۋ ۇسىنىلادى.
ماڭعىستاۋ اۋدانىڭ اكىمدىگىنىڭ مالىمەتىنشە، قاتتى جاۋىن-شاشىن سالدارىنان سۋدىڭ كولەمى ارتىپ، ارنادان اسىپ كەتكەن. اسىرەسە جاڭاورپا جانە اششىبۇلاق شاعىن اۋداندارىندا بىرنەشە ءۇي مەن اۋلا اۋماعىن سۋ باسىپ قالعان.
«قازىرگى ۋاقىتقا دەيىن اۋداندىق №8 ءورت ءسوندىرۋ ءبولىمىنىڭ 101 جەدەل جەلىسىنە تۇرعىنداردان 15 حابارلاما كەلىپ ءتۇستى. اتالعان مەكەمە مەن اۋىل اكىمدىگى بىرلەسىپ، موتوپومپا جانە باسقا دا قۇرىلعىلاردىڭ كومەگىمەن سۋدى سورۋ جۇمىستارىن جالعاستىرۋدا»، – دەپ ءتۇسىندىردى اكىمدىك وكىلدەرى.
سونىمەن قاتار، جاۋاپتى مەكەمەلەر جاعدايدى ءجىتى باقىلاۋدا ۇستاپ وتىرعانىن جانە سۋ باسقان اۋماقتارعا قوسىمشا كومەك جىبەرىلگەنىن جەتكىزدى. اكىمدىك ماماندارى الداعى كۇندەرى دە اۋا رايى قۇبىلىستارىنىڭ الدىن الۋ بويىنشا كەزەكشىلىك جۇمىستارى ۇيىمداستىرىلاتىنىن حابارلادى.
