اباي وبلىسىنىڭ قالا-اۋداندارىندا سۋ تاسقىنىنا قارسى ءىس-شارالار اياسىندا جەرگىلىكتى اكىمدىكتەر مەن كوممۋنالدىق قىزمەتتەر كۇشەيتىلگەن رەجيمگە كوشتى، دەپ حابارلايدى Dalanews.kz
كوكپەكتى اۋدانىندا قار جامىلعىسىنىڭ ورتاشا بيىكتىگى - 77 سم. جەردىڭ توڭى - 72 سم. اۋدان اۋماعىنداعى رەسپۋبليكالىق، وبلىستىق جانە جەرگىلىكتى ماڭىزى بار اۆتوموبيل جولدارىندا 13 كوپىر جانە 107 سۋ وتكىزگىش قۇبىر ورنالاسقان. قازىرگى تاڭدا بارلىعى قاردان تازارتىلعان. اۋدان بويىنشا 34،2 مىڭ تەكشە مەتر قار شىعارىلعان. سىيىمدىلىعى 150 ادامدىق ەۆاكۋاسيالىق پۋنكتتەر دايىندالعان. ۇزىندىعى 1800 مەتر بولاتىن بوگەت سوعۋ جۇمىسى جۇرگىزىلۋدە.
اياگوز اۋدانىندا قار جامىلعىسىنىڭ دەڭگەيى - 51 سم، جەردىڭ توڭى - 23 سم. اياگوز قالاسىنداعى 44 كوشەدەن 108 500 تەكشە مەتر قار شىعارىلعان. 5 كوشەدە جۇمىس جالعاسۋدا. اۋداندا سۋ تاسقىنىنا قارسى شارالارعا 55 تەحنيكا، 36 ەۆاكۋاسيالىق قابىلداۋ پۋنكتى مەن 4 ۋاقىتشا ورنالاستىرۋ پۋنكتى دايىندالعان. اياگوز قالاسى مەن باسقا ەلدى مەكەندەردە وزەن ارنالارىن تازارتۋ جانە جاعالاۋدى نىعايتۋ جۇمىسى جۇرگىزىلۋدە.
ماقانشى اۋدانىندا اۋا رايىنىڭ قولايسىزدىعىنا بايلانىستى قار تازالاۋ جانە شىعارۋ جۇمىسى كۇشەيتىلگەن رەجيمدە جۇرگىزىلدى. قار تازالاۋعا 60 ادام، 21 تەحنيكا جۇمىلدىرىلىپ، ناتيجەسىندە 3900 تەكشە مەتر قار شىعارىلدى. كولىكتەردىڭ قالىپتى ءجۇرۋى مەن تۇرعىنداردىڭ قاۋىپسىزدىگىن قامتاماسىز ەتۋ ءۇشىن ءتيىستى شارالار قابىلداندى. قازىرگى ۋاقىتتا قار تازالاۋ جالعاسۋدا.
بەسقاراعاي اۋدانىندا دا ساقتىق شارالارى جۇرگىزىلۋدە. ازاماتتىق قورعاۋ ورگاندارى مەن كوممۋنالدىق قىزمەتتەر كۇشەيتىلگەن رەجيمگە كوشتى. سۋ تاسقىنىنىڭ الدىن الۋ جانە سالدارىن جويۋ ءۇشىن قاجەتتى ينەرتتى ماتەريالدار مەن وتىن قورى ازىرلەندى. سۋ وتكىزۋ ينفراقۇرىلىمىنا باقىلاۋ كۇشەيتىلدى. جول بويىنداعى بارلىق ماڭىزدى سۋ وتكەلدەرى تازارتىلدى.
بورودۋليحا اۋدانىندا 140 سۋ وتكىزۋ قۇرىلعىسى مەن 15 كوپىر تازارتىلدى. 4000 مىڭ قاپ ينەرتتى ماتەريال دايىندالدى. اۋداندا جىل باسىنان بەرى 21 مىڭ تەكشە مەتر قار شىعارىلدى. ينەرتتى ماتەريالدىڭ قورى - 250 توننا.
تاسقىن ءقاۋپىنىڭ الدىن الۋ ماقساتىندا 5 ناۋرىزدا كراسنىي-يار جانە رەچنوە اۋىلدارى اۋماعىنداعى ءۇبى وزەنىندە مۇز جارۋ جۇمىسى جۇرگىزىلدى.
اباي اۋدانىنداعى اۋىلدىق وكرۋگتەردەن 605 تەكشە مەتر قار شىعارىلدى. اۋدان بويىنشا 8100 قاپ، 500 توننا ينەرتتىك ماتەريال دايىندالدى. اۋداندىق ماڭىزى بار اۆتوجولدارداعى 56 سۋ اعار جانە وبلىستىق ماڭىزى بار جولدارداعى 153 سۋ اعار تازارتىلدى. سونداي-اق جوسپاردان تىس سۋ تاسقىنىنىڭ الدىن-الۋ جانە ءقاۋىپتى ازايتۋ ءۇشىن قاراۋىل جانە شاعان وزەندەرىنىڭ جاعالاۋلارىنىڭ ۇيىندىلەرىن كوتەرۋ، ارنالارىن تۇزەتۋ جۇمىستارى جۇرگىزىلدى.
اقسۋات اۋدانىندا سۋ وتكىزگىش قۇبىرلار، كوپىرلەر، توعاندار، اۋىل اراسىنان وتەتىن ارىقتاردىڭ ارنالارى قاردان تازارتىلدى. ەلدى مەكەندەردەن 7400 تەكشە مەتر قار شىعارىلدى، جۇمىس جالعاسۋدا.
ەسكە سالايىق، بۇعان دەيىن ەلىمىزدەگى سۋ تاسقىنى ءقاۋپى جوعارى ايماقتار اتالدى. ولاردىڭ قاتارىندا اقتوبە، قوستاناي، قاراعاندى، اقمولا، سولتۇستىك قازاقستان، شىعىس قازاقستان وبلىستارى جانە ۇلىتاۋ جانە اباي وبلىستارى بار.
