قازاقستان الىپ تانكەرلەرمەن، ءتۇرلى كەمەلەردى جۇرگىزەتىن جانە سۋ كولىكتەرىنىڭ جان-جاقتى قىزمەت كورسەتەتىن زامان تالابىنا ساي ينجەنەر-مەحانيك مامانداردى دايارلاۋ ءىسىن 2012 جىلى " تەڭىزشيەۆرويل" كومپانياسى قولعا الىپ، دەمەۋشىلىك تانىتقان بولاتىن. مىنە، سودان بەرى قازاقستان تەڭىز اكادەمياسى جان-جاقتى جۇمىس ىستەپ، سۋ كولىگىن اۋىزدىقتايتىن مامانداردى دايارلاپ كەلەدى.
اكادەميا ۇستازدارىنىڭ ايتۋىنشا، ءقازىر تەڭىزشىلەردى دايىنداپ شىعاراتىن بۇل مەكەمە حالىقارالىق تەڭىز ۇيىمىنىڭ White list تىزىمىنە ەنۋدى جوسپارلاپ وتىر. ەگەر اكادەميا سول تىزىمگە ەنسە، وندا ونىڭ تۇلەكتەرىن بۇكىل الەم بويىنشا مويىندايتىن بولادى.
– ازىرگە تۇلەكتەرىمىز حالىقارالىق دارەجەدەگى ديپلومدى الۋ ءۇشىن ومان سۇلتاناتىنا بارىپ وقيدى. وتكەن جىلى تەڭىز اكادەمياسىنىڭ 15 تۇلەگى ومان سۇلتاناتىندا حالىقارالىق تالاپتارعا ساي سەرتيفيكاتتان ءوتىپ، كاسىبي تەڭىزشى ديپلومىن الدى، – دەيدى اكادەميانىڭ ينجەنەريا ءپانىنىڭ اعا وقىتۋشىسى ابىلاي لەكەروۆ.
ءوز ءىسىن جەتىك مەڭگەرگەن مۇعالىمدەردەن بولەك، ستۋدەنتتەردىڭ تولىققاندى مامان بولىپ قالىپتاسۋى ءۇشىن قازاقستان تەڭىز اكادەمياسىنىڭ بازاسى سوڭعى ۇلگىدەگى تەحنيكامەن جابدىقتالعان. مۇندا ولار پنيەۆماتيكا، گيدراۆليكا، ەلەكترومەحانيكا، جوعارى كەرنەۋ جانە توڭازىتقىش قوندىرعى زەرتحانالارى ارقىلى تەوريا جۇزىندە العان بىلىمدەرىن تاجىريبەمەن شىڭدايدى. سونىمەن بىرگە، شەبەرحانادا «تەڭىزشيەۆرويل» كومپانياسىنىڭ قولداۋىمەن الىنعان كەمەلەردە جۇمىس ىستەگەن قوزعالتقىشتار مەن كومەكشى قۇرىلعىلار دا بار.
«تەڭىزشيەۆرويل» كومپانياسى باس ديرەكتورىنىڭ ورىنباسارى مۇرات مۇقاشيەۆ سالتاناتتى راسىمدە تۇلەكتەرگە اق جول تىلەدى.
– «تەڭىزشيەۆرويل» كاسىپورنى سەرىكتەستەرىمىزدىڭ قولداۋىمەن قازاقستان تەڭىز اكادەمياسىنىڭ اشىلۋىنا ءوز ۇلەسىن قوسقانىن ماقتان تۇتادى. بيىل ديپلوم الىپ وتىرعان 18 كادەت تەڭىز تاسىمالى سالاسىندا حالىقارالىق دارەجەدە مويىندالعان قازاقستاندىق مامان بولاتىنىنا سەنەمىز، – دەدى ول.
بولاشاقتا اتالىمىش اكادەميانىڭ ءتامامداعان كادەتتەر ەلىمىزدىڭ سۋ كولىگى جولدارىن دامىتۋعا بار كۇش-جىگەرىن جۇمسايتىنى انىق.
قتا قۇرۋ العىشارتى ەلىمىزدىڭ ستراتەگيالىق دامۋىمەن تىكەلەي بايلانىستى. ويتكەنى بۇگىندە قازاقستان مۇناي مەن باسقا دا ونىمدەردى كاسپيي تەڭىزى ارقىلى وزگە ەلدەرگە تاسىمالداۋدا. مۇنداي جاعدايدا ماماندارىمىز بەن فلوتىمىزدىڭ بولۋى ماڭىزدى.
سوندىقتان قازاقستاننىڭ بارلىق سالادى قۋاتتى كولىك-لوگيستيكاسىن قۇرۋى ەل ەكونوميكاسىنىڭ ۇلكەن سەنىممەن العا جىلجۋىنا كەپىلدىك بەرەتىنى بەلگىلى.
قازاقستان تەڭىز اكادەمياسىنىڭ ماقساتى قاراپايىم – حالىقارالىق دەڭگەيدە مويىندالعان، قازاقستان مەن ودان تىسقارى جەرلەردە تاسىمالداۋ سالاسىندا كوشباسشى، قازىرگى تاڭدا جانە بولاشاقتا كۇردەلى ماقساتتاردى شەشۋگە مۇمكىندىك بەرەتىن كوماندالىق قۇرامداعى بىلىكتىلىگى جوعارى قازاقستاندىق مامانداردى دايىنداۋ بولىپ تابىلادى.
قازاقستان تەڭىز اكادەمياسىن قۇرۋ بويىنشا جوبا قازاقستان ازاماتتارىن ءداستۇرلى مۇناي-گاز سەكتورىنان تىس جۇمىسپەن قامتۋعا باعىتتالعان ۇكىمەتتىڭ ماقساتتارىن شەشۋگە سەپتىگىن تيىزەدى.
بۇل جوبا قازاقستاننىڭ الەمدەگى ۇزاق مەرزىمدى باسەكەگە قابىلەتتىلىگىن ارتتىرۋعا سەپتىگىن تيگىزەدى. سەبەبى تەڭىز اكادەمياسىن بىتىرۋشىلەر قازاقستاندىق ءارى الەمنىڭ كەز كەلگەن ەلىندەگى شەتەلدىك كەمەلەردە، حالىقارالىق تەڭىزدەر، مۇحيتتار مەن قۇرلىقتا دا جۇمىس ىستەۋگە قابىلەتكە يە. ونىمەن قوسا، تۇلەكتەر كەمەجاساۋ، كەمە جالداۋ، تەڭىز قۇقىعى، كەمەجاساۋدى باسقارۋ، كەمەلەردى جوندەۋ مەن تەحنيكالىق قامتاماسىز ەتۋ سالالارىمەن قاتار ەلەكترمەن جابدىقتاۋ سياقتى قوسىمشا سالالاردا دا اۋقىمى كەڭ كاسىبي مىندەتتەردى اتقارا الادى. قبتۋ بىلىكتى مامانداردى دايارلاۋ جولىندا نيدەرلانديانىڭ STC-Group كومپانياسىمەن بىرلەسىپ جۇمىسى ىستەپ كەلەدى. اتالمىش كومپانيا تەڭىز سالاسىندا ءبىلىم جانە كەڭەس بەرۋ قىزمەتى نارىعىنداعى كوشباسشى بولىپ تابىلادى. بۇگىندە STC-Group كومپانياسىنىڭ وڭتۇستىك افريكا، ومان سۇلتاندىعى، فيليپپين، برازيليا جانە يندونەزيا سياقتى ەلدەردە فيليالدارى مەن وكىلدىكتەرى بار.
نۇرلان جۇماحان
