قازاقستاندا ەندى ستراتەگيالىق ينۆەستورلار پايدالى قازبالاردى زەرتتەۋ جانە ءوندىرۋ كەزىندە اۋكسيونسىز باسىم قۇقىققا يە بولادى. سونىمەن قاتار سالانى رەتتەۋ كۇشەيتىلەدى، دەپ حابارلايدى Dalanews.kz.
بۇل تۇزەتۋلەر "جەر قويناۋى جانە جەر قويناۋىن پايدالانۋ تۋرالى" زاڭعا ەنگىزىلدى. سەنات دەپۋتاتتارى زاڭ جوباسىن ەكى وقىلىمدا ماقۇلدادى.
سەنات دەپۋتاتى ساعىندىق لۇقپانوۆ زاڭ جوباسىن تانىستىرا وتىرىپ، ءبىرتۇتاس جەر قويناۋىن پايدالانۋ پلاتفورماسى سالانىڭ نەگىزگى سيفرلىق ينفراقۇرىلىمى رەتىندە جۇمىس ىستەيتىنىن ايتتى.
زاڭعا ەنگىزىلگەن تۇزەتۋلەرگە سايكەس:
- جەر قويناۋىن پايدالانۋ ءبىرتۇتاس سيفرلىق پلاتفورما ارقىلى باقىلانادى جانە جانارماي-ەنەرگەتيكا كەشەنىن باسقارۋ جۇيەسىمەن ينتەگراسيالانادى.
- ۇلتتىق گەولوگيالىق قىزمەت پلاتفورمانى جانە دەرەكتەردى باسقارۋ وپەراتورىنا اينالادى.
- جەر قويناۋىن پايدالانۋدا ىشكى ەلدىك قۇندىلىق ۇلەسى 50%-دان 70%-عا دەيىن ارتتىرىلدى.
- ستراتەگيالىق ينۆەستورلارعا قاتتى پايدالى قازبالاردى زەرتتەۋ مەن وندىرۋدە باسىم قۇقىق بەرىلەدى.
- ءىرى جوبالار ءۇشىن مينيمالدى ينۆەستيسيا – 14،5 ملن مرپ، قايتا وڭدەۋ جوبالارىنا ارنالعان ينۆەستيسيالىق جەڭىلدىكتەر كەڭەيتىلدى.
- جالعان ەسەپ بەرۋ جانە تالاپتاردى بۇزۋ جاعدايىندا جاۋاپكەرشىلىك كۇشەيتىلدى.
ونەركاسىپ جانە قۇرىلىس ۆيسە-مينيسترى يران شارحان زاڭنىڭ ەكولوگيالىق جانە ەكونوميكالىق ماسەلەلەردى شەشۋگە باعىتتالعانىن اتاپ ءوتتى. ول، سونىمەن قاتار، ەلدە قاتتى پايدالى قازبالاردى پايدالاناتىن شامامەن 3 500 سۋبەكت بار ەكەنىن ايتتى.
