مەملەكەت باسشىسى قاسىم-جومارت توقايەۆ قحر شىڭجاڭ-ۇيعىر اۆتونوميالىق اۋدانى قكپ پارتيا كوميتەتى حاتشىسىنىڭ ورىنباسارى، شۇاا حالىق ۇكىمەتىنىڭ ءتوراعاسى ەركين تۋنيازدى قابىلدادى، - دەپ حابارلايدى Dalanews.kz.
"مەن جۋىردا ۇرىمجىگە باردىم. جالپى قازاقستاننىڭ قىتايمەن، سونىڭ ىشىندە شىڭجاڭ پروۆينسياسىمەن اراداعى ىنتىماقتاستىعىن دامىتۋ پەرسپەكتيۆالارىنا بايلانىستى ماڭىزدى كەلىسسوزدەر جۇرگىزدىك. ءبىز قىتايدىڭ ەكونوميكالىق ءوسىمىن ءجىتى باقىلاپ وتىرمىز جانە بۇل باعىتتاعى قارقىندى دامۋى مەن قول جەتكىزگەن ناتيجەلەرىنە باسا ءمان بەرەمىز. جۇڭگو – ەكونوميكالىق دامۋ تۇرعىسىنان الەمدەگى باستى ەلدەردىڭ ءبىرى. سوندىقتان ءبىز سياقتى كورشى مەملەكەتكە ىنتىماقتاستىقتى ىلگەرىلەتۋ ءتيىمدى ءارى قاجەت. قازاقستانعا كەلەر بولساق، وسى ىقپالداستىقتى تابىستى دامىتۋ ءۇشىن قولدان كەلگەننىڭ ءبارىن جاسايمىز، – دەدى پرەزيدەنت.
مەملەكەت باسشىسى ەلىمىز شىڭجاڭمەن ساۋدا، ونەركاسىپ، كولىك، لوگيستيكا، اۋىل شارۋاشىلىعى جانە تۋريزم سياقتى كوپتەگەن سالا بويىنشا تابىستى قارىم-قاتىناس ورناتقانىن مالىمدەدى.
قاسىم-جومارت توقايەۆتىڭ ايتۋىنشا، بۇل ولكە قازاقستاننىڭ قحر-مەن سان قىرلى بايلانىسىن نىعايتۋدا ستراتەگيالىق ءرول اتقارادى.
ەركين تۋنياز قوناقجايلىق تانىتقانى ءۇشىن قاسىم-جومارت توقايەۆقا العىس ايتتى.
"ءۇش زۇلىم كۇشكە" قارسى كۇرەسكە جانە وسى ايماقتاعى تۇراقتىلىقتى ساقتاۋعا قوسقان ۇلەسىڭىز ءۇشىن سىزگە العىس ايتقىم كەلەدى. جۇڭگو مەن قازاقستان اراسىنداعى دوستىقتىڭ تاريحى تەرەڭدە جاتىر. ءتوراعا سي ءسزينپيننىڭ ستراتەگيالىق باسشىلىعىمەن جانە ءسىزدىڭ قولداۋىڭىزبەن "ءبىر بەلدەۋ، ءبىر جول" باستاماسى مەن "نۇرلى جول" ەكونوميكالىق دامۋ باعدارلاماسى ءساتتى ۇشتاستىرىلدى. ەكى ەل ماڭگىلىك ءارى جان-جاقتى ستراتەگيالىق سەرىكتەستىك ورناتتى.
وتكەن جىلى ناۋرىز ايىندا شىڭجاڭ-ۇيعىر اۆتونوميالىق اۋدانى قكپ پارتيا كوميتەتىنىڭ حاتشىسى ما سينجۋي باستاعان دەلەگاسيا قازاقستانعا كەلىپ، وتە ماڭىزدى كەلىسىمدەرگە قول جەتكىزگەنىن ەرەكشە اتاپ وتكەن ءجون. بىلتىر قازان ايىندا ءسىز شىڭجاڭ-ۇيعىر اۆتونوميالىق اۋدانىنا ساپارمەن كەلدىڭىز. بۇل ءوزارا ىنتىماقتاستىعىمىزدى ودان ءارى دامىتۋعا تىڭ سەرپىن بەردى، – دەدى شۇاا حالىق ۇكىمەتىنىڭ ءتوراعاسى.
قاسىم-جومارت توقايەۆ شىڭجاڭ حالىق ۇكىمەتى ءتوراعاسىنىڭ قازاقستانعا ساپارى ءوڭىرارالىق كووپەراسيا مەن شەكارا ماڭىنداعى وبلىستاردىڭ ءوزارا ىنتىماقتاستىعىن ودان ءارى دامىتۋعا ىقپال ەتەتىنىنە سەنىم ءبىلدىردى.
