الەۋمەتتىك جەلىدە "بيۋدجەت قاراجاتى ونسىز دا تاپشى كەزدە پەتروپاۆل اكىمدىگى قىرۋار قارجىعا قىمبات ۇيلەر ساتىپ العانى" تۋرالى اقپارات پايدا بولدى، دەپ حابارلايدى Dalanews.kz.

پەتروپاۆل قالالىق اكىمدىگى جالپى قۇنى 340 ميلليون تەڭگە بولاتىن ەكى جەر ءۇي ساتىپ العانى بەلگىلى بولدى. مالىمەت بويىنشا بۇل ۇيلەر كەيىن ءسۇرىلىپ، ولاردىڭ ورنىنا بالاباقشا سالۋ جوسپارلانعان.

مەملەكەتتىك ساتىپ الۋ پورتالىندا جاريالانعان اقپاراتقا قاراعاندا، ەكى ءۇي دە ءبىر ادامنىڭ مەنشىگىندە بولعان. ءارقايسى ءۇشىن اكىمدىك 170 ميلليون تەڭگە تولەگەن.

الەۋمەتتىك جەلىدە ساتىپ الىنعان ۇيلەردىڭ ۆيدەوسى جاريالاندى. روليكتە ءۇيدىڭ بۇرىنعى يەسى عيمارات ىشىندەگى مۇلىكتەردى، ەسىك-تەرەزەلەردى الىپ كەتىپ جاتقانى ايتىلادى. بۇل جايت تا جەلى قولدانۋشىلارىنىڭ اشۋىنا تيگەن.

بۇعان دەيىن ۇيلەرگە قويىلعان تالاپتار جاريالانعان ەدى. وندا ءبىر ءۇيدىڭ اۋماعى 217 شارشى مەتر، ەكىنشىسىنىڭ اۋدانى 226 شارشى مەتر بولۋى كەرەك ەكەنى كورسەتىلگەن. سوندا ءبىر شارشى مەتردىڭ قۇنى 750-800 مىڭ تەڭگە ارالىعىندا باعالانعان.

جەلىدەگى جۇرتتىڭ پىكىرلەرىنىڭ باسىم بولىگى سىنعا تولى:

• "بۇل ۇيلەردىڭ مۇنداي اقشا تۇرمايتىنى انىق"

• "بيۋدجەتتە اقشا جوق دەيدى، ال ونى قالاي جۇمساپ جاتقانى كورىنىپ تۇر"

• "مۇنى مىندەتتى تۇردە تەكسەرۋ كەرەك"

• "340 ميلليونعا 5-6 ءدال وسىنداي ءۇي سالۋعا بولادى عوي"

قوعام بۇل ساتىپ الۋدىڭ اشىقتىعىنا كۇمان كەلتىرىپ، ءتۇسىندىرۋدى تالاپ ەتىپ وتىر. ال اكىمدىك ازىرگە جاعدايعا قاتىستى تولىققاندى رەسمي تۇسىنىكتەمە بەرگەن جوق.