ق ر قارجى ءمينيسترى ءمادي تاكييەۆ سولتۇستىك قازاقستان وبلىسىنا جۇمىس ساپارىمەن بارىپ، وڭىردەگى نەگىزگى جوبالارمەن تانىستى، دەپ حابارلايدى Dalanews.kz
مينيستر «قىزىلجار» ارنايى ەكونوميكالىق ايماعىندا ينجەنەرلىك-كوممۋنيكاسيالىق ينفراقۇرىلىمنىڭ قۇرىلىسى ماسەلەلەرى بويىنشا كەڭەس وتكىزدى. كەزدەسۋدە مەردىگەرلەردىڭ ينجەنەرلىك جەلىلەردى سالۋ بويىنشا ەسەپتەرى تىڭدالدى. سونداي-اق، وتاندىق جانە شەتەلدىك ينۆەستورلار ارنايى ايماقتا جاڭا وندىرىستەردىڭ قۇرىلىسى بارىسى تۋرالى باياندادى.
ءقازىر №3 سۋبايماقتا نان-توقاش ونىمدەرى زاۋىتى، تراكتورلار مەن اۋىل شارۋاشىلىعى تەحنيكاسىن شىعاراتىن كاسىپورىن، كوتەرگىش — كولىك جابدىقتارى مەن كوپىر كراندارىن ءوندىرۋ زاۋىتى، ساڭىراۋقۇلاق فەرماسى جانە كومپوست زاۋىتى سىندى جوبالار جۇزەگە اسۋدا.
"جالپى العاندا، ءۇشىنشى سۋبايماقتا يتاليا، جۇڭگو، رەسەي جانە گەرمانيادان كاپيتال تارتۋ ارقىلى 105 ملرد تەڭگەگە 16 ينۆەستجوبا ىسكە اسپاق. بۇل جوبالار اياسىندا 1،7 مىڭ جاڭا جۇمىس ورنى اشىلادى"، - دەپ جازدى ءوڭىر باسشىسى عاۋەز نۇرمۇحامبەتوۆ الەۋمەتتىك جەلىدە.
سونداي-اق، ءمادي تاكييەۆ كوپسالالى وبلىستىق اۋرۋحانانىڭ قۇرىلىس بارىسىمەن دە تانىستى. بۇل اۋرۋحانا وڭىردەگى حالىقارالىق ستاندارتتارعا ساي العاشقى جوعارى دەڭگەيدەگى مەديسينالىق مەكەمە بولماق. ماڭىزدى الەۋمەتتىك نىساننىڭ اشىلۋى زاماناۋي تەحنولوگيالاردى ەنگىزۋگە، مەديسينالىق قىزمەتتەردىڭ قولجەتىمدىلىگى مەن ساپاسىن جاقسارتۋعا نەگىز بولادى.
