سولتۇستىك قازاقستان وبلىسى اكىمى عاۋەز نۇرمۇحامبەتوۆتىڭ توراعالىعىمەن وتكەن اكىمدىك وتىرىسىندا جىلىتۋ ماۋسىمىنىڭ ءوتۋى قارالدى،- دەپ حابارلايدى Dalanews.kz 

بۇگىندە وبلىسقا جىلۋ بەرۋدى ەكىنشى جەو، 24 ورتالىق قازاندىق جانە 466 اۆتونومدى قازاندىق قامتاماسىز ەتۋدە. ستانسادا 8 قازاندىق پەن 6 تۋربينا اگرەگاتى جۇمىس ىستەيدى، رەزەرۆتە 2 قازاندىق پەن 1 تۋربينا بار. ءبىر قازاندىقتى كۇردەلى جوندەۋ باستالدى، سونداي-اق ستانسياعا جاڭا مۇرجانى قوسۋ جوسپارلانۋدا. سونىمەن قاتار، قاتتى تاسقىننان زارداپ شەككەن 53 شاقىرىم جوعارى ۆولتتى ەلەكتر جەلىلەرى مەن 737 باعانى قالپىنا كەلدى.   

جامبىل، جۇمابايەۆ، تيميريازيەۆ، ءۋاليحانوۆ جانە شال اقىن اۋداندارىندا 7 بلوك-مودۋلدىك قازاندىق ورناتىلدى. بۇل 20 كوپقاباتتى ءۇي مەن 2 الەۋمەتتىك نىسانعا تۇراقتى جىلۋ بەرۋدى قامتاماسىز ەتتى. سونداي-اق، پرەسنوۆكادا 2 كوپقاباتتى ءۇي مەن 7 الەۋمەتتىك نىسان قوسىلدى. اۋدانداردا 7 قازاندىق الماستىرىلدى.  

كەلەسى جىلىتۋ ماۋسىمىندا ساۋمالكول جانە نوۆويشيم اۋىلدارىندا ورتالىق قازاندىقتار مەن جىلۋ جەلىلەرىن ىسكە قوسۋ جوسپارلانۋدا، تالشىق اۋىلىندا دا جىلۋ جەلىلەرى قوسىلادى. سونىمەن قاتار، جۇمابايەۆ، مۇسىرەپوۆ جانە تيميريازيەۆ اۋداندارىندا جاڭا بلوك-مودۋلدىك قازاندىقتار ورناتىلادى.

جيىندا وبلىس اكىمى ەنەرگەتيكا سالاسىندا مامان تاپشىلىعى ماسەلەسىن اتاپ ءوتتى. ءقازىر ەنەرگەتيكالىق كاسىپورىنداردا 550 بوس جۇمىس ورنى بار. اسىرەسە، ەلەكترمونتەرلەر، ەلەكتروسلەسارلەر، ينجەنەرلەر مەن دانەكەرلەۋشىلەر جەتىسپەيدى. وسىعان بايلانىستى، «جۇمىسشى ماماندىقتارى جىلى» اياسىندا ايماق باسشىسى وقۋ ورىندارىن وبلىسقا قاجەتتى مامانداردى دايارلاۋعا قايتا باعدارلاۋدى تاپسىردى.