بۇگىن سقو اكىمى عاۋەز نۇرمۇحامبەتوۆ «Prosol Spa» كومپانياسىنىڭ ديرەكتورلار كەڭەسىنىڭ ءتوراعاسى ادالبەرتو ۆيللا جانە اتقارۋشى ديرەكتورى دانيەلە بونۆيچينيمەن كەزدەسۋ وتكىزدى، دەپ حابارلايدى Dalanews.kz
يتالياندىق سەرىكتەستەر «Qyzyljar» ارنايى ەكونوميكالىق ايماعىندا مال ازىعىنا ارنالعان اشىتقى وندىرەتىن زاۋىت سالۋ جوباسىن جۇزەگە اسىرۋدا.
"ينۆەستورلارعا سەنىم ءبىلدىرىپ، ءوڭىردىڭ دامۋىنا قوسقان ۇلەستەرى ءۇشىن العىسىمدى ءبىلدىردىم. ءوز تاراپىمىزدان جوبانى جان-جاقتى قولداۋعا دايىنبىز. سولتۇستىك قازاقستان ءوڭىرى ءتيىمدى سەرىكتەستىككە اشىق!"،- دەپ جازدى ءوڭىر باسشىسى الەۋمەتتىك جەلىدە.
زاۋىتتىڭ ءونىمى اۋىل شارۋاشىلىعى جانۋارلارىنىڭ ونىمدىلىگىن ارتتىرۋعا ىقپال ەتەدى. بۇل اسا ماڭىزدى جوبا، ويتكەنى، وڭىردە ءسۇت جانە ەتتى مال شارۋاشىلىعى بەلسەندى دامىپ كەلەدى. جوباعا 3 ميلليارد تەڭگە ينۆەستيسيا سالۋ جوسپارلانعان. كاسىپورىن جىلىنا 3 000 توننا ءونىم ءوندىرىپ، 40 جاڭا جۇمىس ورنىن اشادى.
