تۋريزم جانە سپورت ءمينيسترى ەربول مىرزابوسىنوۆ سپورتشىلارعا باعالى سىيلىقتار تابىستاۋدىڭ ورىندى ەكەنىن مالىمدەدى، دەپ حابارلايدى Dalanews.kz.
ءمينيستردىڭ ايتۋىنشا، چەمپيوندار مەن جۇلدەگەرلەرگە پاتەر “دەنە شىنىقتىرۋ جانە سپورت تۋرالى” زاڭعا سايكەس تابىستالادى. ال باسقا باعالى سىيلىقتارعا قاتىستى اكىمدىكتەرمەن سپورتشىلاردى قولداۋعا قاتىستى كەلىسسوزدەر جۇرگىزىلەتىنىن جەتكىزدى.
“حالىق ءاربىر سپورتشى جارىسقا تۇسكەندە تاقىمىن قىسىپ وتىرادى. بۇل وليمپيادا مەن ازيا ويىندارىندا انىق بايقالدى. جەڭىسپەن ورالعان سپورتشىلاردى ازاماتتارىمىز سىي-قۇرمەتپەن قارسى الىپ، سىياقىسىز قالدىرمادى. ءتىپتى، كەيبىر سپورتشىلار مەدال الماسا دا، ولارعا كولىك سىيلاپ، جىگەرىن جانىعان كەزدەر بولدى”، – دەدى مىرزابوسىنوۆ.
ب ا ق وكىلدەرى وليمپياداعا جولداما العان سپورتشىلارعا باعالى سىيلىقتار بەرۋ داستۇرگە اينالعانىن اتاپ ءوتىپ، ءمينيستردىڭ بۇل ماسەلەگە كوزقاراسىن سۇرادى.
“جوعارى سپورتتىق دەڭگەيگە جەتۋ – بالا كەزدەن قاجىرلى ەڭبەك پەن شىدامدىلىقتىڭ ناتيجەسى. سپورتشىلار كىشكەنتايىنان ۇلكەن جەتىستىكتەرگە ۇمتىلىپ، سپورت پەن ءبىلىمدى قاتار الىپ جۇرەدى. ولار حالىقارالىق جارىستاردا ەلىمىزدىڭ تۋىن بيىكتە كوتەرەدى.
سوندىقتان مەنىڭ ويىمشا، سپورتشىلاردى قولداۋ – دۇرىس قادام. ليسەنزيا العانعا دەيىن الەم جانە ازيا چەمپيوناتتارىندا نەمەسە قازاقستان بىرىنشىلىگىندە جەڭىسكە جەتۋ – ۇلكەن جەتىستىك. سول سەبەپتى سپورتشىلاردى ىنتالاندىرۋ ورىندى دەپ ەسەپتەيمىن”، – دەدى مينيستر ءماجىلىس كۋلۋارىندا.
