سوزاق اۋدانىنىڭ ورتالىعى شولاققورعاندا 200 ورىندىق «سپورتتىق-ساۋىقتىرۋ» كەشەنىنىڭ قۇرىلىسى جۇرگىزىلىپ جاتىر. وسى رەتتە اۋدان اكىمى مۇحيت تۇرىسبەكوۆ نىساننىڭ قۇرىلىس جۇمىستارىمەن تانىسىپ، مەردىگەر مەكەمەگە كەشەندى ۋاقىتىلى ءارى ساپالى اياقتاۋدى تاپسىردى، دەپ حابارلايدى Dalanews.kz.
بۇگىندە سپورت كەشەنىنىڭ شاتىرىنا مەتالل قۇرىلىمىن ورناتۋمەن قاتار، سىلاۋ جۇمىستارى اتقارىلۋدا. كەشەننىڭ وقۋ-جاتتىعۋ بازاسى بارلىق تالاپتارعا ساي جابدىقتالاتىن بولادى. سونداي-اق، جاڭا نىسان ءتۇرلى وبلىستىق، رەسپۋبليكالىق جانە حالىقارالىق سپورتتىق جارىستاردى وتكىزۋگە قولايلى بولماق. ەكى قاباتتان تۇراتىن عيماراتتا ۆولەيبول، باسكەتبول الاڭدارىمەن قاتار، كۇرەس، بوكسقا ارنالعان زال بار. ودان بولەك، باسسەين جانە فۋتبولمەن اينالىسۋ ءۇشىن اشىق سپورت الاڭى بولادى. كەشەن قۇرىلىسىن جىل سوڭىنا دەيىن اياقتاۋ جوسپارلانعان.
