2025 جىلدىڭ العاشقى 5 ايىندا سوزاق اۋدانىندا 81،5 ملرد تەڭگەدەن استام تىكەلەي ينۆەستيسيا تارتىلدى. ال، جالپى وڭىرلىك ءونىمىنىڭ كولەمى 380 ملرد تەڭگەدەن استى. بۇل تۋرالى سوزاق اۋدانىنىڭ اكىمى مۇحيت تۇرىسبەكوۆ جۋرناليستەرمەن وتكەن باسپا ءسوز جيىنىندا باياندادى،- دەپ حابارلايدى Dalanews.kz
«اۋىلشارۋاشىلىق سالاسىندا وسى جىلدىڭ العاشقى جارتىجىلدىعىندا 138،7 ملن تەڭگە ينۆەستيسيا تارتىلدى. قازىرگى تاڭدا وڭىردە 9 مىڭ تونناعا جۋىق ەت جانە ءسۇت ونىمدەرى، 750 مىڭ دانا جۇمىرتقا ءوندىرىلدى. بيىلعى ەگىس ناۋقانىندا 14 638 گەكتار جەرگە اۋىل شارۋاشىلىعى داقىلدارى ەگىلدى. سۋ ۇنەمدەۋ تەحنولوگياسى بويىنشا 163،9 گا جەرگە جاڭبىرلاتىپ، 33 گا جەرگە تامشىلاتىپ سۋارۋ جۇيەسى ەنگىزىلدى. سونداي-اق، كەلەسى جىلى تايقوڭىر ەلدى مەكەنىندە جىلىنا 800 مىڭ توننا كۇكىرت قىشقىلىن وندىرەتىن زاۋىتتىڭ قۇرىلىس جۇمىستارى جۇرگىزىلۋدە. بۇل جوبانىڭ جالپى قۇنى 113،5 ملرد تەڭگەدەن استام. اتالعان جوبا اياقتالعاننان كەيىن 275 ادام تۇراقتى جۇمىسپەن قامتىلاتىن بولادى. ايماقتا وسى جىلدىڭ العاشقى 5 ايىندا 1 826 ازامات الەۋمەتتىك قولداۋمەن قامتىلدى. ۇلتتىق جوبالار اياسىندا 136 جۇمىس ورنى اشۋ كوزدەلسە، بۇگىنگى تاڭدا 28 ورىن اشىلدى. «ەڭبەك نارىعىن دامىتۋ تۇجىرىمداماسى» بويىنشا 1 387 ورىن جوسپارلانىپ، 880 ورىن اشىلدى. بەكىتىلگەن جوسپارعا سايكەس، بوس جۇمىس ورىندارىنا 554 ادام جولداندى. اۋداندا جۇمىسسىزدىق دەڭگەيى – 4،9%. سونىمەن قاتار، وتكىزىلگەن جۇمىس جارمەڭكەلەرىندە 78 مۇمكىندىگى شەكتەۋلى ازامات تۇراقتى جۇمىسپەن قامتىلدى»،- دەدى اۋدان باسشىسى.
ءوڭىر تولىقتاي اۋىز سۋمەن قامتىلعان. تەك ءتورت اۋىل كەستەمەن سۋ ىشەدى. قازىرگى تاڭدا قاراقۇر مەن قوزمولداق اۋىلدارىندا 24 ساعاتتىق اۋىز سۋمەن قامتۋ ءۇشىن جوبالىق سمەتالىق قۇجاتتارى دايىندالۋدا.
سونداي-اق، وڭىرگە تابيعي گاز تارتۋ جۇمىستارىنا وبلىستىق بيۋدجەتتەن 290 ميلليون تەڭگەگە جۋىق قاراجات قارالعان. شولاققورعان اۋىلىنا گاز تارتۋ ءۇشىن 216،6 شاقىرىم قۇبىر تارتىلىپ، قازىرگى تاڭدا 3 200 ابونەنت كوگىلدىر وتىنمەن قامتىلدى. اۋدان ورتالىعىندا 7 شاقىرىم اياق جولعا 235 دانا جارىقشام، 4 ايالداما، 60 قوقىس جاشىگى مەن ورىندىقتار ورناتىلۋدا.
بۇدان بولەك، بيىل «اۋىل – ەل بەسىگى» باعدارلاماسى اياسىندا 447 ملن 330 مىڭ تەڭگەگە 12 كوشەگە 14،2 شاقىرىم اسفالت توسەلەدى دەپ جوسپارلانۋدا.
سونداي-اق، ازاماتتاردى تۇرعىن ۇيمەن قامتۋ ماقساتىندا اۋدان ورتالىعىنداعى «جەتكىنشەك» مولتەك اۋدانىندا 1 قاباتتى 2 پاتەرلى – 26 ءۇي، 2 قاباتتى 8 پاتەرلى – 3 ءۇيدىڭ قۇرىلىس جۇمىستارى جۇرگىزىلۋدە. سالىنىپ جاتقان ۇيلەر كەزەكتە تۇرعان الەۋمەتتىك وسال توپتاعى ازاماتتارعا بەرىلەتىن بولادى.
سونىمەن قاتار، «كازاتومپروم» اق دەمەۋشىلىگىمەن – 2 قاباتتى 16 پاتەرلى ءۇي سالىنۋدا. ودان بولەك، قۇنى 2 ملرد تەڭگەگە جۋىق شولاققورعان اۋىلىنداعى سپورتتىق-ساۋىقتىرۋ كەشەنى جاقىن كۇندەرى ەل يگىلىگىنە پايدالانۋعا بەرىلەدى.
سونداي-اق، «استانا» مولتەك اۋدانى ينفراقۇرىلىمىن دامىتۋ ماقساتىندا قۇرىلىس جۇمىستارى جۇرگىزىلۋدە. تۇرعىنداردىڭ بوس ۋاقىتىن ءتيىمدى وتكىزۋ ماقساتىندا شولاققورعان اۋىلىندا قۇنى 1 ملرد تەڭگەنى قۇرايتىن كىتاپحانا قۇرىلىسى جۇرگىزىلۋدە. اتالعان نىسان كەلەسى جىلعا وتپەلى.
