مەملەكەت باسشىسى قاسىم-جومارت توقايەۆ كەشە قازاق عىلىمىنىڭ قارا شاڭىراعى - عىلىم ورداسىندا عالىمدارمەن كەزدەستى. پرەزيدەنت بۇگىنگى زامان عىلىم مەن ءبىلىمنىڭ زامانى ەكەنىنە توقتالىپ، "وتانىمىزدى كوركەيتەمىز دەسەك، ەڭ الدىمەن، وسى ەكى سالانى دامىتۋىمىز كەرەك. بۇدان باسقا جول جوق" دەپ ناقتى مىندەت قويدى.
عىلىم - قاي-قاي ەلدىڭ دە قوزعاۋشى كۇشى. عىلىمدى دامىتۋ ءۇشىن عالىمدارعا جاعداي جاسالۋى قاجەت. بۇل جونىندە قاسىم-جومارت توقايەۆ "ءبىز عالىمدارعا جاعداي جاساۋ كەرەك دەپ ءجيى ايتامىز. بۇل – قۇر ءسوز ەمەس" دەدى. راسىندا دا، قازاق رۋحانياتىنىڭ، قازاق ءبىلىم-عىلىمىنىڭ قايماقتارى جينالعان القالى كەزدەسۋدىڭ سوڭىندا جاس عالىمدار باسپانالى بولدى، - دەپ حابارلايدى Dalanews.kz.
مەملەكەت باسشىسى كەزدەسۋدە اكادەميك قانىش ساتبايەۆتىڭ ءومىر جولىنان مىسال كەلتىردى. عالىم 25-30 جاس شاماسىندا قازاق عىلىمى ءۇشىن تەڭدەسىز جاڭالىقتار اشقان. پرەزيدەنت جاستار اراسىنان دا شوقان، اباي، ءاليحان، احمەت، قانىش سەكىلدى زيالىلار شىعاتىنىنا سەنىم ءبىلدىرىپ، عالىمدارعا الەۋمەتتىك قولداۋ كورسەتۋ قاشان دا ماڭىزدى، وزەكتى بولىپ قالا بەرەتىنىن جەتكىزدى.
بۇگىندە مەملەكەت عالىمداردى قولداۋ ءۇشىن ناقتى شارالاردى جۇزەگە اسىرىپ جاتىر. پرەزيدەنت ءوز سوزىندە الداعى ەكى جىلدا جاس عالىمداردىڭ زەرتتەۋىنە بولىنەتىن گرانت سانى تاعى دا كوبەيەتىنىن مالىمدەدى. بۇعان بيۋدجەتتەن 18 ميلليارد تەڭگە بولىنبەك.
ال ەڭ باستىسى عالىمدار تەك عىلىمي باعىتپەن اينالىسىپ، تابىستارعا جەتۋى ءۇشىن مەملەكەت باسپانا ماسەلەسىن دە شەشىپ بەرىپ وتىر.
"بىلتىر 284 جاس عالىم باسپانا الدى. بيىل مەنىڭ تاپسىرماممەن ولارعا تاعى 200 پاتەر بەرىلەتىن بولدى. وسىنداي ناقتى شارالار ارقىلى ەلىمىزدەگى عىلىمدى جانە جالپى عالىمدار قاۋىمىن قولداۋ جۇمىسى الداعى ۋاقىتتا دا جالعاسىن تابادى"، - دەدى مەملەكەت باسشىسى.
شارا سوڭىندا پرەزيدەنت قاسىم-جومارت توقايەۆ عىلىمنىڭ ءتۇرلى سالاسىندا ەسەلى ەڭبەك ەتىپ جۇرگەن بىرنەشە ازاماتقا سالتاناتتى تۇردە پاتەر سەرتفيكاتتارىن تابىستادى.
بۇل تىزىمدە مىنا عالىمدار بار:
- ابيلدينا ايناز قايرات قىزى – ق.ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ قاۋىمداستىرىلعان پروفەسسورى؛
- مولدامۇراتوۆ جانعازى نۇرجان ۇلى – حالىقارالىق ءبىلىم بەرۋ كورپوراسياسىنىڭ جالپى قۇرىلىس فاكۋلتەتىنىڭ دەكانى؛
- ءاليا تەمىرحان – قازاقستان-بريتان تەحنيكالىق ۋنيۆەرسيتەتىنىڭ عىلىمي قىزمەتكەرى؛
- قۇرمانوۆ ەرعالي بەرجىگىت ۇلى – ءال-فارابي اتىنداعى قازاق ۇلتتىق ۋنيۆەرسيتەتىنىڭ دوسەنتى؛
- جانۇزاق رامازان جاقسىباي ۇلى – ءا.ح. مارعۇلان اتىنداعى ارحەولوگيا ينستيتۋتىنىڭ زەرتحانا مەڭگەرۋشىسى؛
- وماروۆا جانسايا باعدات قىزى – ق.ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ اعا وقىتۋشىسى؛
- باكرانوۆ نۇرلان بولات ۇلى – قازاقستان رەسپۋبليكاسى پرەزيدەنتى جانىنداعى ۇلتتىق عىلىم اكادەمياسىنىڭ باس قىزمەتكەرى؛
- قۇلتايەۆا شىنار مالىك قىزى – حالىقارالىق ءبىلىم بەرۋ كورپوراسياسىنىڭ قاۋىمداستىرىلعان پروفەسسورى؛
- بايجۇما سامەت – ءال-فارابي اتىنداعى قازاق ۇلتتىق ۋنيۆەرسيتەتىنىڭ وقىتۋشىسى.
- ءادىلحان باۋىرجان نۇكەربەك ۇلى – سەيسمولوگيالىق باقىلاۋ جانە زەرتتەۋ ۇلتتىق عىلىمي ورتالىعىنىڭ لابوراتوريا مەڭگەرۋشىسى.
كەزدەسۋدە باسپانالى بولعان عالىمداردىڭ ءبىرى - ءال-فارابي اتىنداعى قازاق ۇلتتىق ۋنيۆەرسيتەتىنىڭ دوسەنتى ەرعالي قۇرمانوۆ. ول بۇگىندە قازۇۋ-دا فيزيكا جانە استرونوميا سالاسىندا عىلىمي زەرتتەۋ جۇمىستارىمەن اينالىسادى.
عالىم ەل پرەزيدەنتىنە شىنايى العىسىن ءبىلدىردى.
"مەن ءۇشىن قۋانىشتى جاڭالىق. ويتكەنى جاستاردىڭ، سونىڭ ىشىندە جاس عالىمداردىڭ الەۋمەتتىك جاعدايى جاقسارىپ جاتىر. وتە قۋانىشتىمىن. ءالى سەنىپ تۇرعان جوقپىن. بىزگە ودان ءارى جاقسى جۇمىس جاساۋعا موتيۆاسيا. تەك ءوزىمىزدىڭ جۇمىسىمىزدى ويلاپ، ارتىق ەشتەڭە ويلاماي، جۇمىسقا عانا كوڭىل بولەتىندەي جاعداي جاسالىپ جاتىر.
ءوزىمنىڭ زەرتتەۋ وبلىسىم - فيزيكا جانە استرونوميا. مەملەكەت باسشىسى قاسىم-جومارت كەمەلۇلىنا، قولداۋ كورسەتكەن ارىپتەستەرىمە جانە اتا-اناما العىسىمدى بىلدىرەمىن"، - دەدى ءال-فارابي اتىنداعى قازاق ۇلتتىق ۋنيۆەرسيتەتىنىڭ دوسەنتى ەرعالي قۇرمانوۆ.
پرەزيدەنت قولىنان پاتەر سەرتيفيكاتىن العانداردىڭ ءبىرى - ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە ساياساتتانۋ فاكۋلتەتىنىڭ وقىتۋشىسى سامەت بايجۇما. ول عىلىمداعى ەڭبەك جولىن قازۇۋ-داعى "ءال-فارابي" ورتالىعىندا عىلىمي قىزمەتكەر بولىپ باستاعان. سونىمەن قاتار، جاس عالىم - كوپبالالى اكە.
"مەملەكەت باسشىسىنىڭ قازاقستاننىڭ جاس عالىمدارىمەن كەزدەسۋى شاراسى اياسىندا پاتەرگە قولىمىز جەتىپ جاتىر. بۇل ءوز كەزەگىندە ءبىزدىڭ جاس عالىمداردىڭ عىلىممەن ەش الاڭسىز اينالىسۋىنا جاسالعان ۇلكەن ءبىر قولداۋ دەپ بىلەمىز. جاس عالىمداردىڭ الەۋەتى، سونداي-اق،ولاردىڭ الەۋمەتتىك جاعدايى قاراستىرىلعان. ءوز باسىمدى الاتىن بولسام، بەس بالانىڭ اكەسىمىن. جاس عالىمداردىڭ اراسىندا كونكۋرستان ءوتىپ، وسىنداي ۇلكەن قۋانىشقا يە بولىپ جاتقانىما وتە قۋانىشتىمىن"، - دەدى سامەت بايجۇما.
