قىزىلوردا وبلىسىنىڭ اكىمى نۇرلىبەك نالىبايەۆ ق ر پارلامەنتى سەناتىنىڭ دەپۋتاتى نۋريا نيازوۆا جانە «اسسامبلەيا جاستارى» قوعامدىق بىرلەستىگىنىڭ ءتوراعاسى تيمۋر جۇمىربايەۆپەن كەزدەستى. كەزدەسۋدە قازاقستان حالقى اسسامبلەياسىنىڭ مەرەيلى 30 جىلدىعى اياسىندا وڭىردە اتقارىلعان جۇمىستار مەن الداعى جوسپارلار ءسوز بولدى، دەپ حابارلايدى Dalanews.kz
قىزىلوردا وبلىسىندا ءبىلىم، عىلىم، جۋرناليستيكا، قوعامدىق قىزمەت، سپورت، مەديسينا، مادەنيەت، كاسىپكەرلىك، وندىرىستە ەڭبەك ەتەتىن، مەملەكەتتىك جاستار ساياساتىنىڭ دامۋىنا وزىندىك ۇلەسىن قوسقاندارعا وبلىس اكىمىنىڭ «سىر ءۇمىتى» سىيلىعى جىل سايىن تابىستالىپ كەلەدى.
باسپاناعا مۇقتاجدىق ماسەلەسىن شەشۋ ءۇشىن «سىر جاستارى» باعدارلاماسى قولعا الىندى. وعان وبلىستىق بيۋدجەتتەن «وتباسى بانك» تۇرعىن ءۇي قۇرىلىس جيناق بانكى» ارقىلى كرەديت بەرۋگە 1،2 ملرد تەڭگە ءبولىندى. «سىر جاستارى» – جىلىنا 100 جاس وتباسىنى باسپانامەن قامتۋعا باعىتتالعان، وڭىرلىك تىڭ جوبا، ايماق جاستارىن قولداۋ مەن قامقورلىقتىڭ جارقىن ۇلگىسى.
اۋدان ورتالىقتارىنىڭ بارلىعىندا تيپتىك ۇلگىدەگى «رۋحانيات ورتالىقتارى» بوي كوتەردى. بۇل عيماراتتا ارداگەرلەر، انالار كەڭەسى، ارحيۆ، مۋزەي، جاستار ورتالىقتارىمەن بىرگە اسسامبلەيا مۇشەلەرىنە دە «قوعامدىق كەلىسىم» كابينەتى قاراستىرىلعان. وندا جەرگىلىكتى ەتنومادەني بىرلەستىكتەر باس قوسادى. وبلىستىق ەتنومادەني بىرلەستىكتەر «دوستىق ۇيىندە»، ال اۋدانداردا «رۋحانيات ورتالىقتارىندا» بەلسەندى جۇمىس جاساپ، ەتنوسارالىق قاتىناستىڭ نىعايۋىنا سەپتىگىن تيگىزە بەرمەك.
بيىل قىزىلوردا قالاسىنداعى بەيبارىس سۇلتان كوشەسىنىڭ بويىنان جاڭا ۇلگىدەگى «دوستىق ءۇيىنىڭ» قۇرىلىسى باستالدى. عيمارات جىل سوڭىندا ەل يگىلىگىنە بەرىلەدى.
نۋريا نيازوۆا مەن تيمۋر جۇمىربايەۆ سىر ەلىندە اتقارىلعان جۇمىستارعا وڭ باعاسىن بەرىپ، وسى ىستەردىڭ بارلىعى جاستاردىڭ، ەتنوس وكىلدەرىنىڭ، جالپى تۇرعىندار اراسىنداعى تاتۋلىقتى، كەلىسىمدى ودان ءارى نىعايتاتىنىن ايتتى.
