قىزىلوردا وبلىسىنىڭ اكىمى نۇرلىبەك نالىبايەۆتىڭ توراعالىعىمەن دەنە شىنىقتىرۋ- ساۋىقتىرۋ كەشەنىن سالۋ جوباسى بويىنشا جيىن ءوتتى، دەپ حابارلايدى Dalanews.kz
جيىنعا «قازاقستان حالقىنا» قوعامدىق قورىنىڭ باسقارما ءتورايىمى ءلاززات شىڭعىسبايەۆا، جاۋاپتى سالا باسشىلارى، زيالى قاۋىم وكىلدەرى جانە قوردان بالالارىنىڭ ەمىنە كومەك العان اتا-انالار قاتىستى.
باسقوسۋدا قىزىلوردا وبلىسىنىڭ اكىمدىگى، «قازاقستان حالقىنا» قوعامدىق قورى جانە «ر ي ا سەرۆيس لتد» جاۋاپكەرشىلىگى شەكتەۋلى سەرىكتەستىگى اراسىندا دەنە شىنىقتىرۋ-ساۋىقتىرۋ كەشەنىن سالۋ تۋرالى ءۇشجاقتى مەموراندۋمعا قول قويىلدى.
ايماق باسشىسى بىرلەسىپ اتقارىلاتىن جۇمىستارعا توقتالىپ، الداعى جوسپارلاردى ءبولىستى.
«پرەزيدەنتىمىز قاسىم-جومارت كەمەل ۇلىنىڭ تىكەلەي باستاماسىمەن دەنساۋلىق ساقتاۋ، ءبىلىم بەرۋ جانە الەۋمەتتىك قولداۋ سالالارىنداعى ماسەلەلەردى شەشۋ ماقساتىندا قۇرىلعان «قازاقستان حالقىنا» قوعامدىق قورىمەن تىعىز بايلانىس ورناتىلىپ، وڭىرىمىزدە بىرلەسكەن جوبالار قولعا الىنعان.
بۇگىن قوردىڭ قولداۋىمەن قىزىلوردا قالاسىنان قۇنى 2 ملرد. 900 ملن. تەڭگە (قور – 2 ملرد. 300 ملن. تەڭگە، وب – 600 ملن. تەڭگە) بولاتىن دەنە شىنىقتىرۋ-ساۋىقتىرۋ كەشەنىن سالۋ ءۇشىن ءۇشجاقتى كەلىسىمگە قول قويۋ راسىمىنە جينالدىق.
پرەزيدەنتىمىزدىڭ، ۇكىمەتتىڭ ەرەكشە قولداۋىمەن سىر وڭىرىندە بايىپتى باستامالار قولعا الىنىپ، جاسامپاز جوبالار جۇزەگە اسۋدا. وبلىس بيۋدجەتىن 750 ملرد تەڭگەدەن اسىردىق. ساۋلەتى مەن ءسانى كەلىسكەن جاڭا عيماراتتار بوي كوتەرىپ، ەل يگىلىگىنە تابىستالۋدا.
مەملەكەت باسشىسىنىڭ «تۋعان جەردى بىرگە تۇلەتەيىك!» ۇندەۋىنە وراي جەرگىلىكتى كاسىپكەرلەر، قوعامدىق قورلار، وبلىستان شىققان مەسەناتتار ورتاق ىسكە بەلسەندى ارالاسىپ، قايىرىمدىلىق شارالارىنا، سىر ەلىن كوركەيتۋگە ۇلەس قوسۋدا.
بۇگىندە دەمەۋشىلەردىڭ 50 ملرد. تەڭگەدەن استام قارجىسىنا ىرگەلى ىستەر اتقارىلدى. قور ۇجىمىنا قاجىرلى دا قوماقتى ەڭبەگى ءۇشىن ريزاشىلىعىمىزدى بىلدىرەمىز. بولاشاقتا دا قارىم-قاتىناسىمىز ءوزارا ءتيىمدى نەگىزدە قۇرىلادى دەپ ۇمىتتەنەمىز»، – دەدى ن.نالىبايەۆ.
جيىندا ءلاززات شىڭعىسبايەۆا وڭىردەگى جۇمىستارعا وڭ باعاسىن بەردى. سونىمەن قاتار، وبلىستىق ارداگەرلەر كەڭەسىنىڭ ءتوراعاسى سەرىك دۇيسەنبايەۆ پەن ەڭبەك ارداگەرى، قوعام قايراتكەرى يبراگيم ابيبۋللايەۆ باستامالارعا ساتتىلىك تىلەدى. اتا-انالار اتىنان دوسبول ساتتىبايەۆ قور ۇجىمىنا لەبىزىن ءبىلدىردى.
ايتا كەتەيىك، «قازاقستان حالقىنا» قوعامدىق قورى ايماقتا 7 ملرد. 150 ملن تەڭگەنىڭ جوبالارىن جۇزەگە اسىرۋدا. سوڭعى ەكى جىلدا ءوڭىردىڭ دەنساۋلىق ساقتاۋ سالاسىنا 4 ملرد. 800 ملن. تەڭگە قارجى باعىتتادى. بۇل قارجىعا وبلىستىق بالالار اۋرۋحاناسى بازاسىندا جانە جاڭاقورعان اۋدانىندا «قامقورلىق» ورتالىقتارى اشىلىپ، قاجەتتى دارى-دارمەك الىندى.
قوردىڭ قولداۋىمەن ارال اۋدانىندا دا «قامقورلىق» ورتالىعى سالىنۋدا. مامىر ايىندا پايدالانۋعا بەرىلەدى. سونداي-اق، وبلىستىق ونكولوگيا ورتالىعىن قۇنى 1 ملرد. 100 ملن. تەڭگە بولاتىن سكرينينگ جۇرگىزۋگە ارنالعان جىلجىمالى مەديسينالىق كەشەنمەن قامتاماسىز ەتتى. بۇل كەشەن ەلىمىزدىڭ 3 وڭىرىندە عانا بار. قازىرگى كەزدە ايماقتىڭ شالعاي ەلدى مەكەندەرىندەگى تۇرعىندارعا تۇراقتى قىزمەت كورسەتەدى.
«قازاقستان حالقىنا» قوعامدىق قورى «اۋىلدىق ايماقتارداعى تىرەك مەكتەپتەردىڭ الەۋەتىن دامىتۋ» جوباسىن دا ىسكە اسىرۋدا. جوبا اياسىندا 2022-2024 جىلدارى 6 مەكتەپ 1 ملرد. 500 ملن. تەڭگەگە قايتا جابدىقتالدى. بيىل تاعى 2 مەكتەپكە 500 ملن تەڭگە قارجى قارالعان.
قور دەمەۋشىلىگىمەن 172،5 ملن. تەڭگەگە جىلدام تۇرعىزىلاتىن انگار تيپتەس سپورت كەشەنى شيەلى اۋدانى اقتوعان اۋىلىندا سالىنىپ، ەل يگىلىگىنە تابىستالدى. جالاعاش اۋدانى اققىر اۋىلىنداعى سپورت كەشەنى جاقىن كۇندەرى پايدالانۋعا بەرىلەدى. ال سىرداريا اۋدانىنا سپورتتىق قۇرال-جابدىقتار الىنىپ، بولمەلەر جابدىقتالدى.
