مەجٸلٸس دەپۋتاتى اسحات ايماعامبەتوۆ سىنىپ جەتەكشٸلەرٸنە جەكە شتات اشۋ قاجەتتٸگٸن ايتتى, دەپ حابارلايدى Dalanews.kz.
بۇل تۋرالى ول Qaz365.kz سايتىنا بەرگەن سۇحباتىندا بٶلٸستٸ.
بۇعان دەيٸن وقۋ-اعارتۋ مينيسترٸ عاني بەيسەمباەۆ بٸلٸم سالاسىنىڭ ماماندارىمەن كەزدەسۋدە سىنىپ جەتەكشٸلەرٸنە قاتىستى جاقسى جاڭالىقتى جارييالاعان بولاتىن. ونىڭ سٶزٸنشە, سىنىپ جەتەكشٸلٸگٸ ٷشٸن تٶلەنەتٸن ٷستەمەاقى ٷش ەسەگە ٶسەدٸ, بۇل تۋرالى مەملەكەت باسشىسى كەلٸسٸم بەرگەن. قازٸرگٸ ۋاقىتتا بۇل ٷستەمەاقى 10 مىڭ تەڭگە بولسا, ەندٸ 30 مىڭ تەڭگەگە دەيٸن كٶتەرٸلمەك.
الايدا اسحات ايماعامبەتوۆ مەكتەپتەردە سىنىپ جەتەكشٸلٸگٸن جەكە شتات رەتٸندە قاراستىرۋ قاجەت دەگەن پٸكٸردە.
"مۇعالٸمدەردٸڭ مەرتەبەسٸ تۋرالى زاڭ قابىلدانعاندا بٸز ٷستەمەاقىنى ەكٸ ەسە ۇلعايتتىق. سونىمەن بٸرگە قوسىمشا جوسپار دا بولعان ەدٸ. سول جوسپار بويىنشا سىنىپ جەتەكشٸلەرٸن جەكە شتات رەتٸندە قاراستىرىپ, ولارعا جەكە جالاقى تٶلەۋدٸ كٶزدەگەنبٸز. بۇل جٷيە كەيبٸر شەتەلدٸك مەكتەپتەر مەن نازارباەۆ زيياتكەرلٸك مەكتەپتەرٸندە قولدانىلىپ كەلەدٸ. بٸز بۇل يدەيانى قارجىلاي ەسەپتەپ تە كٶردٸك", - دەدٸ دەپۋتات.
اسحات ايماعامبەتوۆتىڭ ايتۋىنشا, ول مينيستر بولعان كەزدە بۇل جوسپاردى جٷزەگە اسىرۋ ٷشٸن 100 ميللياردتان استام قارجى قاجەت ەكەنٸ ەسەپتەلگەن. قارجى مينيسترلٸگٸ مەن ٷكٸمەتكە ۇسىنىستار دا بەرٸلگەن.
"بۇل شەشٸم ٶتە ماڭىزدى. قازٸرگٸ كەزدە سىنىپ جەتەكشٸلٸگٸن مۇعالٸمدەردٸڭ نەگٸزگٸ جۇمىسىنان بٶلٸپ, ونى جەكە شتات رەتٸندە قاراستىرۋىمىز قاجەت. بٸراق, مەنٸڭ قىزمەتٸم كەزٸندە بۇل مەسەلەنٸ تولىق شەشٸپ ٷلگەرمەدٸك. دەگەنمەن, بيۋدجەت كٶلەمٸندە ۇسىنىستار ەنگٸزدٸك. سوندىقتان بۇل باستامانى ارى قاراي جالعاستىرىپ, نەتيجەگە جەتكٸزۋ كەرەك", - دەدٸ ەكس-مينيستر ايماعامبەتوۆ.
