Májilis depýtaty Ashat Aimaǵambetov synyp jetekshilerine jeke shtat ashý qajettigin aitty, dep habarlaidy Dalanews.kz.
Bul týraly ol Qaz365.kz saityna bergen suhbatynda bólisti.
Buǵan deiin Oqý-aǵartý ministri Ǵani Beisembaev bilim salasynyń mamandarymen kezdesýde synyp jetekshilerine qatysty jaqsy jańalyqty jariialaǵan bolatyn. Onyń sózinshe, synyp jetekshiligi úshin tólenetin ústemeaqy úsh esege ósedi, bul týraly Memleket basshysy kelisim bergen. Qazirgi ýaqytta bul ústemeaqy 10 myń teńge bolsa, endi 30 myń teńgege deiin kóterilmek.
Alaida Ashat Aimaǵambetov mektepterde synyp jetekshiligin jeke shtat retinde qarastyrý qajet degen pikirde.
"Muǵalimderdiń mártebesi týraly zań qabyldanǵanda biz ústemeaqyny eki ese ulǵaittyq. Sonymen birge qosymsha jospar da bolǵan edi. Sol jospar boiynsha synyp jetekshilerin jeke shtat retinde qarastyryp, olarǵa jeke jalaqy tóleýdi kózdegenbiz. Bul júie keibir sheteldik mektepter men Nazarbaev Ziiatkerlik mektepterinde qoldanylyp keledi. Biz bul ideiany qarjylai eseptep te kórdik", - dedi depýtat.
Ashat Aimaǵambetovtyń aitýynsha, ol ministr bolǵan kezde bul jospardy júzege asyrý úshin 100 milliardtan astam qarjy qajet ekeni eseptelgen. Qarjy ministrligi men Úkimetke usynystar da berilgen.
"Bul sheshim óte mańyzdy. Qazirgi kezde synyp jetekshiligin muǵalimderdiń negizgi jumysynan bólip, ony jeke shtat retinde qarastyrýymyz qajet. Biraq, meniń qyzmetim kezinde bul máseleni tolyq sheship úlgermedik. Degenmen, biýdjet kóleminde usynystar engizdik. Sondyqtan bul bastamany ary qarai jalǵastyryp, nátijege jetkizý kerek", - dedi eks-ministr Aimaǵambetov.
