پرەزيدەنتتىك جاستار كادرلىق رەزەرۆىنىڭ مۇشەلەرى ۆولونتەرلىك باستاما رەتىندە جامبىل وبلىسىنىڭ شۋ قالاسىندا ۇستەل تەننيسىنەن رەسپۋبليكالىق تۋرنير ۇيىمداستىرىپ، بالالار جىلىنا ارنالعان جاسوسپىرىمدەر اراسىندا باسكەتبولدان اشىق اۋداندىق تۋرنير وتكىزدى، – دەپ حابارلايدى Dalanews.kz.

ءىس-شاراعا اقپارات جانە قوعامدىق دامۋ ۆيسە-مينيسترى الەكساندر دانيلوۆ قاتىسىپ، وسكەلەڭ ۇرپاقتىڭ باسەكەگە قابىلەتتىلىك رۋحىن قالىپتاستىرۋ مەن نىعايتۋدىڭ، ونىڭ ىشىندە دەنە شىنىقتىرۋ جانە سپورتقا باۋلۋدىڭ ماڭىزدىلىعىنا توقتالدى. مۇنداي ءىس-شارالاردى جۇزەگە اسىرۋ ءۇشىن مەملەكەت، بيزنەس جانە قوعامدىق سەكتور سينەرگياسىنىڭ قاجەتتىگى ەرەكشە اتالدى.

سپورت جارىستارىندا قازاقستاننىڭ ءار وڭىرىنەن كەلگەن 150-دەن استام بالالار مەن جاسوسپىرىمدەر ءوز شەبەرلىكتەرىن كورسەتتى، جەڭىمپازدارعا مەدالدار، گراموتالار جانە ەستەلىك سىيلىقتار تابىستالدى.



تۋرنيرلەردى ۇيىمداستىرۋشى، پرەزيدەنتتىك جاستار كادرلىق رەزەرۆىنىڭ مۇشەسى ماقسات دجاتابايەۆ بۇل ەپيدەميولوگيالىق شەكتەۋلەرگە بايلانىستى ەكى جىلدىق ۇزىلىستەن كەيىن بالالار جىلى اياسىندا وتكەن العاشقى رەسپۋبليكالىق سپورتتىق ءىس-شارالاردىڭ ءبىرى ەكەنىن ايتا كەلىپ، ەلدەگى بالالار سپورتىن تەك مەملەكەت تاراپىنان عانا ەمەس، سونىمەن قاتار، ازاماتتىق جانە كاسىپكەرلىك قوعامداستىقتار، باستاماشىل توپتار تاراپىنان دا ودان ءارى قولداۋعا سەنىم ءبىلدىردى.