شىعىس قازاقستان وبلىسى اكىمى دانيال احمەتوۆ جۋرناليستەرمەن كەزدەسۋىندە جاقىن بولاشاقتا رەسپۋبليكا تۇرعىندارى شىعىستا وندىرىلگەن ەلەكتر قۋاتىن وزىندىك قۇنى بويىنشا تۇتىنا باستايتىنىن العا تارتتى. بۇل قۋات كوزىن جوعارى دەڭگەيدە ۇنەمدەۋگە مۇمكىندىك بەرەتىن "ەلەكتربەلدەۋ – ورتالىق شق" جوباسى اياقتالعاننان كەيىن ىسكە اسۋى مۇمكىن. شىعىس قازاقستان وبلىسى اۋماعىندا حالىقتى ارزان قۋات كوزىمەن قامتاماسىز ەتەتىن بۇدان باسقا دا جوبالار ىسكە اسىپ جاتقانىن وبلىس باسشىسى العا تارتتى.
– كۇن ەنەرگياسى بويىنشا ماڭىزدى "جاڭعىز سولار" جوباسى قازىرگى تاڭدا جۇزەگە اسىپ جاتىر. بۇل باعىتتا بىزدەر يسپانيانىڭ ARESOL كومپانياسىمەن تىزە قوسىپ، جۇمىس ىستەپ جاتقان جايىمىز بار. شەتەلدىك ينۆەستورمەن ارىپتەستىك باعىتتا ىسكە اسىپ جاتقان جوبا اياقتالعاندا 35 مۆت قۋات كوزىن وندىرۋگە مۇمكىندىك بەرەدى، – دەدى وبلىس اكىمى دانيال احمەتوۆ.
بۇدان باسقا جەل ەنەرگياسىن دامىتۋ باعىتى بويىنشا قۋاتى 62،5 مۆت بولاتىن ەكى جوبانىڭ مۇمكىندىگىن 200 مۆت-قا دەيىن ۇلعايتۋ باعىتىندا قارقىندى جۇمىستار ءجۇرىپ جاتقانىن اتاپ ايتۋعا بولادى. جەلدەن قۋات كوزىن وندىرەتىن نىساندار جارما اۋدانىندا ورنالاسقان. ءبىرىنشى جوبانى ىسكە اسىرۋعا "ۆەۋ شار" ج ش س ۇسىنىس جاساعاننان كەيىن وبلىستىق اكىمدىك سەرىكتەستىككە 33 گەكتار جەر تەلىمىن بەرگەن. جوبانىڭ جالپى قۇنى 68 ملن. دوللاردى قۇرايدى. ال ەكىنشى جەل قالاقشالارىن تۇرعىزۋعا باعىتتالعان جوبانى قۇنى 18 ملرد. تەڭگەنى قۇرايدى. اتالعان جوبالار الداعى جىلدىڭ ەكىنشى جارتى جىلدىعىندا اياقتالادى دەپ جوسپارلانۋدا.
– ءبىز ءۇشىن گيدروەنەرگەتيكا سالاسىن دامىتۋدىڭ دا ماڭىزى زور. بۇل سالا بويىنشا وڭىردە ناقتى جۇمىستار ءجۇرىپ جاتىر. ايتالىق، "تۇرعىسىن گەس-1" جوباسى تابىستى ىسكە اسۋدا. قازىرگى تاڭدا گيدروتەحنيكالىق نىساننىڭ سۋ جينايتىن قويماسى تولىقتاي اياقتالعان. جوبانىڭ باس مەردىگەرى "قىتايدىڭ مەملەكەتتىك سۋ ەنەرگەتيكاسى كومپانياسى" بولىپ تابىلادى. بۇل جوباعا مەملەكەتتىك ساراپتاۋ جۇمىستارى جۇرگىزىلگەن. وسىلايشا وبلىسىمىزدا "ەكسپو-2017" كورەمەسىندە باستى تاقىرىپقا اينالعان "جاسىل ەكونوميكا" بويىنشا 5 جوبا ىسكە اسۋدا. بولاشاقتا ولاردىڭ قاتارى وزگە دە جوبالارمەن تولىعا تۇسەتىنە سەنىمدىمىن، – دەدى شىعىس قازاقستان وبلىسى اكىمى دانيال احمەتوۆ.
