2025 جىلى شىعىس قازاقستان وبلىسىندا قۇقىق قورعاۋ ورگاندارى تۇرمىستىق قىلمىستاردىڭ، ينتەرنەتتەگى قۇقىق بۇزۋشىلىقتاردىڭ جانە قوعامدىق ءتارتىپ بۇزۋشىلىقتاردىڭ الدىن الۋ بويىنشا بەلسەندى جۇمىسىن جالعاستىرۋدا، سونداي-اق قوعامدا «زاڭ جانە ءتارتىپ» قاعيداسىن نىعايتۋعا باسا نازار اۋدارۋدا، – دەپ حابارلايدى Dalanews.kz شقو اكىمىنىڭ باسپا ءسوز قىزمەتىنە سىلتەمە جاساپ.
ازاماتتاردى، ەڭ الدىمەن كامەلەتكە تولماعانداردى جانە ايەلدەردى قورعاۋعا، سونداي-اق قوعامدىق قاۋىپسىزدىككە ءقاۋىپ توندىرەتىن قۇقىق بۇزۋشىلىقتاردىڭ الدىن الۋعا ەرەكشە كوڭىل بولىنۋدە.
شىعىس قازاقستان وبلىسىندا تۇرمىستىق سالاداعى قىلمىستاردىڭ جارتىسىنان استامى الكوگولدىك ماساڭ كۇيدە جاسالادى. 2025 جىلى پوليسيانىڭ ءوتىنىشى بويىنشا ءوڭىر سوتتارى ق ر اقبتك-نىڭ 54-بابى اياسىندا 266 قۇقىق بۇزۋشىعا الكوگولدىك ىشىمدىكتەردى تۇتىنۋعا تىيىم سالدى. بۇل شارا وتكەن جىلى دا قولدانىلىپ، 291 ادامعا قاتىستى شەكتەۋ ەنگىزىلگەن ەدى.
– ءبىز تۇرمىستىق قىلمىستارعا، اسىرەسە الكوگولدىك ماساڭ كۇيدە جاسالاتىن قىلمىستارعا قارسى كۇرەستى جالعاستىرۋدامىز. الكوگولدى تۇتىنۋعا قويىلعان تىيىم وڭ ناتيجە بەرۋدە، سوندىقتان ءبىز بۇل شارانى قايتالانعان قۇقىق بۇزۋشىلىقتاردىڭ الدىن الۋ ءۇشىن ءارى قاراي دا قولداناتىن بولامىز. وسى جىل ىشكى ىستەر مينيسترلىگى تاراپىنان الدىن الۋ جىلى دەپ جاريالاندى، سوندىقتان ءبىز قىلمىستىڭ الدىن الۋعا ەرەكشە نازار اۋدارىپ وتىرمىز، – دەدى شقو پد باستىعى، پوليسيا گەنەرال-مايورى ەرلان وماربەكوۆ.
جىل باسىنان بەرى وڭىردەگى داعدارىس ورتالىقتارىنا 1 700-دەن استام ايەل پسيحولوگتاردىڭ كەڭەسىنە جىبەرىلدى، سونداي-اق 48 ايەل مەن 17 بالا ۋاقىتشا تۇرۋ ءۇشىن ارنايى پانالاۋ ورىندارىنا ورنالاستىرىلدى.
ايەلدەرگە قاتىستى قىلمىستار سانى وتكەن جىلمەن سالىستىرعاندا 7%-عا تومەندەدى – بۇل پوليسيا مەن الەۋمەتتىك قىزمەتتەردىڭ بىرلەسكەن جۇمىسىنىڭ وڭ ناتيجەسى.
سونىمەن قاتار، تۇرمىستىق سالادا قۇقىققا قايشى ارەكەتتەر جاساعانى ءۇشىن 1 315 ادام اكىمشىلىك جاۋاپكەرشىلىككە تارتىلدى.
الايدا، ماسەلە وزەكتى كۇيىندە قالىپ وتىر – 142 ادام تۇرمىستىق زورلىق-زومبىلىق قۇرباندارىنا جاقىنداۋعا تىيىم سالاتىن قورعاۋ ۇيعارىمدارىن ەلەمەي، قايتادان جاۋاپكەرشىلىككە تارتىلدى.
2024 جىلى ەسىرتكى، پورنوگرافيالىق ماتەريالدار، ءسۋيسيدتى ناسيحاتتاۋ جانە زاڭسىز ونلاين-كازينو سياقتى تىيىم سالىنعان اقپاراتتاردى تاراتقان 1 770 سايت بۇعاتتالدى.
2025 جىلى بۇل باعىتتاعى جۇمىستار كۇشەيتىلىپ، العاشقى ءۇش ايدىڭ وزىندە وسىنداي 3 000-نان استام سىلتەمە بۇعاتتالدى.
پوليسيا ازاماتتاردى قىراعىلىق تانىتۋعا جانە كۇدىكتى ينتەرنەت-رەسۋرستار تۋرالى حابارلاۋعا شاقىرادى، وسىلايشا جاس ۇرپاق ءۇشىن ءقاۋىپسىز اقپاراتتىق ورتا قالىپتاستىرۋعا بىرلەسىپ اتسالىسۋعا ۇندەيدى.
2024 جىلى الكوگول ءىشىپ، قوعامدىق ورىنداردا ماس كۇيىندە جۇرگەنى ءۇشىن 3 047 ادام جاۋاپكەرشىلىككە تارتىلدى. 2025 جىلى بۇل كورسەتكىش ءالى دە جوعارى – 2 776 جاعداي تىركەلدى.
سونداي-اق، تىيىم سالىنعان ورىنداردا تەمەكى شەگۋمەن، ونىڭ ىشىندە قىزدىرىلاتىن تەمەكى ونىمدەرى مەن ەلەكتروندى سيگارەتتەردى پايدالانۋمەن كۇرەس جۇرگىزىلۋدە. 2024 جىلى 130 ادام اكىمشىلىك جاۋاپكەرشىلىككە تارتىلسا، بيىل بۇل سان 100-گە جەتتى.
ۇساق بۇزاقىلىق پەن قوعامدىق ورىنداردى لاستاۋ ماسەلەسى دە وزەكتى. 2024 جىلى بۇزاقىلىق ءۇشىن 335 ادام جاۋاپقا تارتىلسا، 2025 جىلى بۇل كورسەتكىش 324ء-تى قۇرادى.
قوعامدىق ورىنداردى لاستاۋمەن بايلانىستى قۇقىق بۇزۋشىلىقتار دا باقىلاۋدا. وتكەن جىلى 2 265 جاعداي تىركەلسە، 2025 جىلى بۇل كورسەتكىش 1 128-گە جەتتى.
– ءبىز قۇقىقتىق مادەنيەتتى قالىپتاستىرۋ ءۇشىن قوعاممەن بەلسەندى ءوزارا ءىس-قيمىل جاسايمىز. قاۋىپسىزدىك پەن ءتارتىپ – بۇل ورتاق جاۋاپكەرشىلىك، جانە ءبىزدىڭ مىندەتىمىز – قۇقىق بۇزۋشىلىقتاردى انىقتاۋ عانا ەمەس، سونىمەن قاتار ولاردىڭ الدىن الۋ. «زاڭ جانە ءتارتىپ» قاعيداسى ءار ازاماتتىڭ ءومىرىنىڭ نەگىزىنە اينالۋى ءتيىس، – دەپ اتاپ ءوتتى شقو پد باستىعى، پوليسيا گەنەرال-مايورى ەرلان وماربەكوۆ.
شىعىس قازاقستان وبلىسىنىڭ پوليسيا دەپارتامەنتى زاڭدى ساقتاۋ جانە قوعامدىق تارتىپكە قۇرمەتپەن قاراۋ – بۇل تەك مىندەت قانا ەمەس، سونىمەن قاتار جايلى ءارى ءقاۋىپسىز ءومىردىڭ نەگىزى ەكەنىن ەسكە سالادى. ءاربىر ازامات ءوزىنىڭ ازاماتتىق جاۋاپكەرشىلىگىن ءتۇسىنىپ، قوعامدىق نورمالاردى ساقتاۋعا ۇمتىلۋى ءتيىس.
