باتىستىق ب ا ق استانادا ءوتىپ جاتقان شانحاي ىنتىماقتاستىق ۇيىمىنىڭ (شىۇ) سامميتىنە بايلانىستى جان-جاقتى پىكىر بىلدىرۋدە، دەپ حابارلايدى Dalanews.kz.
ولاردىڭ جازۋىنشا، شىۇ جۇڭگو، رەسەي جانە يراندى بىرىكتىرەتىن "ناتو-عا قارسى" جيىن رەتىندە سيپاتتالۋدا.
"ورتا ازيا مەملەكەتتەرى گەوگرافيالىق شىندىعىنان قاشىپ قۇتىلا المايدى جانە ەكونوميكالىق جاعىنان وركەندەۋى ءۇشىن رەسەي مەن قىتايعا ۇلكەن سەنىم ارتۋعا ءتيىس. سونىمەن قاتار ولاردىڭ بولاشاقتاعى تاۋەلسىزدىگى بەلگىلى ءبىر ەرەجەلەرگە نەگىزدەلگەن حالىقارالىق تارتىپكە قۇرمەت كورسەتۋىن تالاپ ەتەدى"، - دەيدى The Times Of Central Asia اگەنتتىگى.
سونىمەن قاتار ولار قازاقستانداعى سوڭعى دەموكراتيالىق رەفورمالار "ناتو-عا قارسى" ەلدەردىڭ اۆتوريتارلىق بەينەسىنە قاراما-قايشى كەلىپ جاتقانىن دا العا تارتادى. جاقىندا ارمەنيا ۇجىمدىق قاۋىپسىزدىك تۋرالى شارت (ۇقشۇ) ۇيىمىنداعى مۇشەلىگىن توقتاتاتىنى تۋرالى مالىمدەگەن ەدى. جالپى العاندا، ايماق ەلدەرى – ءارتۇرلى ىنتامەن – كوپۆەكتورلى سىرتقى ساياساتتى جۇزەگە اسىرىپ كەلەدى.
"شىۇ-نىڭ استانادا ءوتىپ جاتقان ءىس-شاراسى شىعىسقا باعىتتالعان كوشباسشىلار توبىن بىرىكتىرەدى. ولار ۇيىم مۇشەلەرى اراسىنداعى ىنتىماقتاستىقتى تەرەڭدەتۋ تۋرالى ءسوز قوزعايدى. باتىس ءباسپاسوزى بۇل جيىندى باتىسقا قارسى دەپ ايىپتاسا دا، ورتا ازيانىڭ رەسەيگە قارسى حالىقارالىق سانكسيالاردى قولداۋى جانە ۋكراينامەن قاقتىعىستا بەيتاراپتىق تانىتۋى ۆلاديمير پۋتين مەن ونىڭ جاقتاستارىن ايتارلىقتاي رەنجىتكەنى راس"، - دەيدى باسىلىم.
