بايدەن پرەزيدەنت قىزمەتىنە كىرىسكەلى بەرى العاشقى كەزدەسۋىن ميلۋوكيدەگى (ۆيسكونسين شتاتى) سايلاۋشىلارمەن وتكىزدى. جۇزدەسۋدە سىرتقى ساياسات ماسەلەلەرى دە ءسوز بولدى.
"قىتايعا شارا قولدانىلادى، ول بۇنى بىلەدى"، - دەدى بايدەن، جۇڭگو ليدەرى سي ءسزينپيندى ءسوز ەتىپ.
سي سزينپين شىڭجاڭداعى ۇيعىر، قازاق جانە يسلام ءدىنىن ۇستاناتىن باسقا دا ۇلت وكىلدەرىن "قايتا تاربيەلەۋ لاگەرلەرىنە" ماجبۇرلەپ جىبەرگەنى ءۇشىن الەمدىك قاۋىمداستىقتىڭ سىنىنا ۇشىرادى.
پەكين جابىق مەكەمەلەردى "كاسىبي دايىندىق ورتالىقتارى" دەپ اتاپ، وندا ادامدارعا راديكال يدەيالاردان ارىلۋعا كومەكتەسەدى دەۋدەن تانباي وتىر.
"جۇڭگو الەم ليدەرى بولۋعا تالپىنىپ-اق جاتىر. مۇنداي مارتەبەگە جەتۋ ءۇشىن ول باسقا دا ەلدەردىڭ سەنىمىنەن شىعۋى ءتيىس. ادامنىڭ باستى قۇقىقتارىن بۇزاتىن ارەكەتتەرىنەن باس تارتپاسا، مۇنداي ماقساتقا جەتۋ قيىن بولادى"، - دەيدى بايدەن.
11 اقپاندا بايدەن جۇڭگو باسشىسى سي سزينپينمەن ەكى ساعات تەلەفونمەن سويلەسىپ، سول كەزدە پەكيننىڭ ادام قۇقىقتارىن ساقتاماي وتىرعانىنا الاڭدايتىنىن ايتتى. بايدەن جۇڭگو بيلىگىنىڭ گونكونگتەگى دەموكراتياشىل بەلسەندىلەردى باسىپ-جانشىعانىن دا ءسوز ەتتى.
قىتايدىڭ مەملەكەتتىك اقپارات قۇرالدارى تاراتقان مالىمەتكە قاراعاندا، سي سزينپين اقش-قا قىتايدىڭ ەگەمەندىگى مەن اۋماقتىق تۇتىتاستىعى، سونىڭ ىشىندە گونكونگ جانە شىڭجاڭ ماسەلەلەرىن قوزعاعاندا اباي بولۋىن ەسكەرتكەن.
