شىمكەنتتە جول قاۋىپسىزدىگىن كۇشەيتۋ ماقساتىندا جۇرگىزىلىپ جاتقان اۋقىمدى جەدەل-پروفيلاكتيكالىق ءىس-شارا اياسىندا ءبىر اپتادا 500-دەن استام كولىك ايىپتۇراقتارىنا قويىلعان، دەپ حابارلايدى Dalanews.kz.
24.kz ارناسىنىڭ مالىمەتىنشە، قالاعا جامبىل، قاراعاندى جانە قىزىلوردا وبلىستارىنان ارنايى جاساق كەلگەن. قازىرگى ۋاقىتتا پاترۋلدىك قىزمەت تاۋلىك بويى، ياعني كۇندىز دە، تۇندە دە ۇزدىكسىز جۇمىس ىستەپ جاتىر.
تەكسەرۋ بارىسىندا جول ەرەجەسىن بۇزعان نەمەسە قۇجاتتارى تالاپقا ساي ەمەس كولىكتەر بىردەن ايىپ تۇراعىنا جونەلتىلەدى. سونىڭ ناتيجەسىندە ءبىر اپتا ىشىندە 500-دەن استام اۆتوكولىك ارنايى تۇراققا قويىلعان.
تەكسەرۋ بارىسىندا قالادا العاشقى مەديسينالىق قوبديشا، ءورت سوندىرگىش جانە جارىق شاعىلىستىراتىن كەۋدەشەلەرگە سۇرانىس كۇرت ارتقان. سونداي-اق تەحنيكالىق قىزمەت كورسەتۋ ورتالىقتارىندا دا كەزەك كوبەيگەن. كولىك يەلەرى قىسقى دوڭگەلەكتەرىن اۋىستىرىپ قانا قويماي، اينەكتەگى جارىقتاردى جوندەۋگە دە جۇگىنە باستاعان.
الايدا پوليسيا وكىلدەرى ءبىر اپتا ىشىندە العاشقى كومەك قوبديشاسى نەمەسە ءورت سوندىرگىشتىڭ بولماعانى ءۇشىن ەشكىمگە ايىپپۇل سالىنباعانىن اتاپ ءوتتى.
قۇقىق قورعاۋ ورگاندارى بارلىق جۇمىس جول قوزعالىسى ەرەجەلەرىنە سايكەس جۇرگىزىلىپ جاتقانىن مالىمدەدى. سونىمەن قاتار تۇرعىندار اراسىندا تۇسىنبەۋشىلىك تۋىنداپ، ءتۇرلى سۇراق كوبەيگەنى ايتىلدى.
"حالىقتان كوپ سۇراق ءتۇسىپ جاتىر، ءبىز ءتۇسىندىرۋ جۇمىستارىن جۇرگىزۋدەمىز. رەسمي پاراقشالار مەن بارلىق قولجەتىمدى ارنالار ارقىلى اقپارات بەرىلۋدە. ەشقانداي دۇربەلەڭگە بەرىلۋدىڭ قاجەتى جوق"، – دەپ حابارلادى شىمكەنت قالالىق پوليسيا دەپارتامەنتى 24.kz ارناسىنا.
