شىمكەنت قالاسىندا قازىرگى تاڭدا 21 ۇلى وتان سوعىسىنىڭ ارداگەرى تۇرادى. 9 مامىر – جەڭىس مەرەكەسىنە وراي ءار قارت مايدانگەرگە جىل سايىنعى ءبىر رەتتىك اقشالاي تولەمدەر تۇرىندەگى الەۋمەتتىك كومەك – 360 اەك ياعني، 1 050 120 تەڭگەدەن بەرىلدى، – دەپ حابارلايدى Dalanews.kz شىمكەنت قالاسى اكىمدىگىنىڭ باسپا ءسوز قىزمەتىنە سىلتەمە جاساپ.

قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ مالىمەتىنشە، قاراجات بارلىق سوعىس ارداگەرلەرىنىڭ ەسەپ-شوتتارىنا تولىعىمەن اۋدارىلعان.

سونداي-اق، قالالىق ءماسليحاتتىڭ شەشىمىمەن 3307 تىل ارداگەرىنە 12 اەك، ياعني 35 مىڭ تەڭگەدەن استام ءبىر رەتتىك اقشالاي تولەم جۇرگىزىلۋدە. تىل ارداگەرلەرىنە بارلىعى 115 ملن 758 مىڭ تەڭگە كولەمىندە قارجى بولىنگەن.

7 مامىر – وتان قورعاۋشىلار مەرەكەسى قارساڭىندا سوعىس ارداگەرلەرىنە تەڭەستىرىلگەن ازاماتتارعا، اتاپ ايتقاندا، اۋعانستانعا جىبەرىلگەن اسكەري مىندەتتىلەر، 1986-1987 جىلدارى چەرنوبىل اتوم ەلەكتر ستانسياسىنداعى اپاتتىڭ زارداپتارىن جويۋعا قاتىسقان ادامدار، سەمەي پوليگونى يادرولىق قارۋدى سىناۋدىڭ سالدارىنان مۇگەدەك بولعان، رادياسيالىق اپاتتار مەن اۆاريالاردان زارداپ شەككەن ازاماتتارعا  36 اەك (105 012 تەڭگە) كولەمىندە اقشالاي كومەك اۋدارىلادى.

جالپى، بۇگىنگى تاڭدا شىمكەنت قالاسى بويىنشا زەينەتكەرلەر سانى – 82 124 بولسا، ونىڭ ىشىندە 21 ۇلى وتان سوعىسىنىڭ ارداگەرى بار. 3307 تىل ەڭبەككەرى جانە 1728 ۇوس قاتىسۋشىلارعا تەڭەستىرىلگەن ازاماتتار تۇرادى.