ق ر ۇقك-نىڭ شىمكەنت قالالىق دەپارتامەنتىنىڭ بۇرىنعى ءبىرىنشى ورىنباسارى مانات سارباسوۆتىڭ ءىسى سوتتا قارالىپ جاتىر. وعان ءبىرقاتار باپ بويىنشا ايىپ تاعىلۋدا، دەپ حابارلايدى Dalanews.kz inform.kz-عا سىلتەمە جاساپ.

شىمكەنتتە ۇقكد باستىعىنىڭ بۇرىنعى ءبىرىنشى ورىنباسارى مانات سارباسوۆقا قاتىستى اتىشۋلى سوت پروسەسى ءجۇرىپ جاتىر. ول الاياقتىق جاسادى، پارا الدى جانە پارانى بەرۋگە ءماجبۇر ەتتى دەپ ايىپتالادى. وعان قاتىستى ءىس ەكى رەزونانستىق ەپيزود بويىنشا وتۋدە.

بىرىنشىسىندە كۋاگەر ەلميرا دۇيسەن قىزى ۇقكد باسشىسىنىڭ بۇرىنعى ورىنباسارى جەكەمەنشىك مەكتەپتەن 2007 جىلدان بەرى ەكى جىل قاتارىنان جۇمىسقا جالعان ورنالاستىرىلعان قىزمەتكەرلەرگە بايلانىستى اي سايىن كوز جۇما قاراپ، قامقورشىلىق تانىتقانى ءۇشىن اقى تالاپ ەتكەنىن ايتادى. الدىمەن بۇل سوما 1 ملن تەڭگەنى قۇراسا، كەيىن  5 ملن تەڭگەگە دەيىن وسكەن.

سونىمەن قاتار، كۋاگەردىڭ ايتۋىنشا، سارباسوۆ ءوزىنىڭ تۋىستارى مەن تانىستارىن جۇمىسقا ورنالاستىرۋعا تىرىسقان. دۇيسەن قىزىنىڭ ايتۋىنشا، زاڭسىز تولەمدەردىڭ جالپى سوماسى 435 ملن تەڭگەگە جەتكەن. الاياقتىق جانە 278 ملن تەڭگەگە قۇجاتتاردى قولدان جاساۋ فاكتىسى بويىنشا انتيكور تەكسەرۋ باستاعاندا ايەل سارباسوۆتىڭ ۇستىنەن ۇقك-عا شاعىمدانعان، سونىڭ نەگىزىندە قىلمىستىق ءىس قوزعالادى.

ەكىنشى ەپيزود 2020 جىلى پاندەميا كەزىندە مەديسينالىق جابدىقتار مەن قورعانىس قۇرالدارىن ساتىپ الۋمەن بايلانىستى. مەملەكەتكە كەلتىرىلگەن زالال 100 ملن تەڭگەدەن استام سوماعا باعالانادى.

بۇل رەتتە ۇقكد باستىعىنىڭ بۇرىنعى ءبىرىنشى ورىنباسارىمەن بىرگە ونىڭ بۇرىنعى كومەكشىسى دە سوتتالۋشىلار ورىندىعىنان تابىلدى. ول زاڭسىز كاسىپكەرلىك جانە كىرىستەردى جىلىستاتتى دەپ ايىپتالۋدا.

سونداي-اق، بۇرىن سوتتالعان جانە 5،5 ملن تەڭگە كولەمىندە ايىپپۇل تولەگەن قالالىق دەنساۋلىق ساقتاۋ باسقارماسى باسشىسىنىڭ بۇرىنعى ورىنباسارى جانە مەديسينالىق جابدىقتاردى جەتكىزۋگە جەتەكشىلىك ەتكەن قۇرىلىس باسقارماسىنىڭ وكىلى سوتقا تارتىلدى. 

سوت القابيلەردىڭ قاتىسۋىمەن وتۋدە.

ايتا كەتسەك، مانات سارباسوۆتىڭ شىمكەنت قالاسىنىڭ ەكس-اكىمى ماقسۇت يساحوۆقا قارسى اتىشۋلى ىستە دە اتى اتالادى. ەكس-شەنەۋنىك ۇقكد باستىعىنىڭ ءبىرىنشى ورىنباسارىنا پارا بەرۋگە وقتالدى دەپ ايىپتالادى. تەرگەۋدىڭ مالىمەتىنشە، ماقسۇت يساحوۆ مانات سارباسوۆقا وزىنە قارسى قوزعالعان قىلمىستىق ءىستى جابۋ ءۇشىن 200 مىڭ دوللار ۇسىنعان. سوت پروسەسى كەزىندە سوتتالۋشى ۇقكد باستىعىنىڭ بۇرىنعى ءبىرىنشى ورىنباسارى وزىنە كەكتەنىپ جۇرگەنىن ايتقان. اقىرىندا ماقسۇت يساحوۆ 8 جىل 5 ايعا باس بوستاندىعىنان ايىرىلدى.