شىمكەنتتە تۇرعىن ءۇي باسقارماسى باسشىسىنىڭ ورىنباسارى 9 جىلعا سوتتالدى، - دەپ حابارلايدى Dalanews.kz. 

شىمكەنت قالالىق قىلمىستىق ىستەر جونىندەگى اۋدانارالىق سوتىندا قالالىق تۇرعىن ءۇي باسقارماسى باسشىنىڭ ورىنباسارى م. جانە جەكە كاسىپكەر و.-عا قاتىستى قىلمىستىق ءىس قارالدى.

تەرگەپ-تەكسەرۋ ورگانىمەن م. لاۋازىمدى ادامنىڭ ادامدار توبىنىڭ الدىن الا ءسوز بايلاسۋى بويىنشا اسا ءىرى مولشەردەگى بيۋدجەت قاراجاتىن جىمقىرعانى (قك-نىڭ 189-بابى 4-بولىگىنىڭ 2) تارماعى) جانە لاۋازىمدى ادامنىڭ قىلمىستىق جولمەن الىنعان ءىرى مولشەردەگى اقشانى زاڭداستىرعانى ءۇشىن قك-نىڭ 218-بابى 3-بولىگىنىڭ 1)، 3) تارماقتارى) ايىپتالعان.

و. - الدىن الا ءسوز بايلاسۋى بويىنشا اسا ءىرى مولشەردەگى بيۋدجەت قاراجاتىن جىمقىرعانى ءۇشىن (قك-نىڭ 189-بابى 4-بولىگىنىڭ 2) تارماعى) ايىپتالعان.

م. شىمكەنت قالاسىنىڭ تۇرعىن ءۇي باسقارماسى باسشىنىڭ ورىنباسارى بولا تۇرا، 2023 جىلى كوپقاباتتى تۇرعىن ۇيلەردىڭ سەيسميكالىق تۇراقتىلىعى بويىنشا تەحنيكالىق زەرتتەۋ جۇرگىزۋگە قاتىستى مەملەكەتتىك ساتىپ الۋ شارتتارى بويىنشا ورىندالماعان جۇمىستاردى جانە كوپقاباتتى تۇرعىن ۇيلەردىڭ جوندەۋ جۇمىستارىنا قاتىستى ورىندالماعان جۇمىستاردى قابىلداپ، بيۋدجەتتىڭ جالپى 367 ملن. تەڭگەدەن استام اقشانى سوتتالۋشى – جەكە كاسىپكەر و.-نىڭ كومەگىمەن جىمقىرعان.

و. باسقا تۇلعالاردىڭ اتىنا تىركەلگەن جانە تەندەرلەر بويىنشا جەنىمپاز بولعان جشس-تەر ارقىلى اقشا قاراجاتتارىن العان.

م. ءوزىنىڭ اتا-اناسىنىڭ اتىنا تىركەلگەن مونشا كەشەنىن سالۋدى ۇيىمداستىرىپ، وسى ارقىلى قىلمىستىق جولمەن تاپقان اقشانى زاڭداستىرعان.

سوتتالۋشىلاردىڭ كىناسى كۋالەردىڭ جاۋاپتارىمەن، زاتتاي دالەلدەمەلەرمەن، جاسىرىن تەرگەۋ ارەكەتتەرىمەن، ستەنوگراممامەن، ساراپشىلاردىڭ جانە مامانداردىڭ قورىتىندىلارىمەن جانە باسقا دا ءىس بويىنشا جيناقتالعان دالەلدەمەلەردىڭ جيىنتىعىمەن تولىق دالەلدەندى.

سوت، سوتتالۋشىلاردىڭ قىلمىستىق جاۋاپكەرشىلىگىن جەڭىلدەتەتىن ءمان-جايلار رەتىندە ولاردىڭ ءار قايسىسىنىڭ اسىراۋىندا ءجاسوسپىرىم بالالارىنىڭ بولۋىن تانىدى.

م.-نىڭ قىلمىستىق جاۋاپكەرشىلىگىن اۋىرلاتاتىن ءمان-جاي رەتىندە قىلمىستىق قۇقىق بۇزۋشىلىقتى بەرگەن كاسىبي انتىن بۇزا وتىرىپ جاساۋىن تانىدى، و.-نىڭ قىلمىستىق جاۋاپكەرشىلىگىن اۋىرلاتاتىن ءمان-جايلار انىقتالمادى.

سوتپەن م. قك-نىڭ 189-بابى 4-بولىگىنىڭ 2) تارماعىمەن، 218-بابى 3-بولىگىنىڭ 1)، 3) تارماقتارىمەن كىنالى دەپ تانىلىپ، وعان تۇپكىلىكتى مۇلكىن تاركىلەپ، 9 جىلعا باس بوستاندىعىنان ايىرۋ جازاسى تاعايىندالدى.

و. قك-نىڭ 28-بابى 5-بولىگىنىڭ، 189-بابى 4-بولىگىنىڭ 2) تارماعىمەن كىنالى دەپ تانىلىپ، وعان 8 جىل مەرزىمگە باس بوستاندىعىنان ايىرۋ جازاسىن تاعايىندادى.

سوت ۇكىمى زاڭدى كۇشىنە ەنگەن جوق.