شىمكەنتتە قارجى پيراميداسىن ۇيىمداستىرعان 10 ادام سوتتالدى، دەپ حابارلايدى Dalanews.kz.
شىمكەنت قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا ون سوتتالۋشىعا (ءبىر سوتتالۋشى قىلمىستى كامەلەت جاسىنا تولماعان كەزدە جاساعان) قاتىستى قىلمىستىق ءىس قارالدى.
تاعىلعان ايىپ:
سوتتالۋشىلار قارجىلىق (ينۆەستيسيالىق) پيراميدانى قۇرۋ، وعان باسشىلىق ەتۋ (قك-نىڭ 217-بابى 3-بولىگى 2)-تارماعى)، قىلمىستىق جولمەن تاپقان اقشانى زاڭداستىرۋ (جىلىستاتۋ) (كق-نىڭ 218-بابى 3-بولىگى 3)-تارماعى)، كۋانى جالعان ايعاقتار بەرۋ ماقساتىندا پاراعا ساتىپ الۋ (قك-نىڭ 422-بابى 1-بولىگى) جانە پيراميدانىڭ جۇمىسىنا كومەكتەسۋ بويىنشا ايىپتاعىلعان.
ءىستى قاراۋ ناتيجەسىمەن انىقتالعانى:
سوتتالۋشى ق. 2024-2025 جىلدار ارالىعىندا اسا ءىرى مولشەردە قارجىنى تارتا وتىرىپ قارجىلىق پيراديميدانى قۇرۋ جانە وعان باسشىلىق ەتۋ ماقساتىندا، ءوزىنىڭ جوباسىن الەۋمەتتىك جەلىلەردە جارنامالاپ، العان اقشانى جوعارى پايىزبەن قايتاراتىنىن ايتىپ، اۋدارىم جاساتۋ جانە قولما-قول الۋ جولىمەن اسا ءىرى مولشەردە 600 ملن. تەڭگەدەن اسا اقشا قاراجاتتارىن تارتقان.
وعان قوسا قىلمىستىق جاۋاپكەرشىلىكتەن جالتارۋ جانە تەرگەۋدى بۇركەمەلۋ ماقساتىندا كۋا ا.-نىڭ جالعان ايعاق بەرۋى ءۇشىن ونىڭ ەسەپ شوتىنا ءۇشىنشى تۇلعالاردىڭ اتىنان اقشا اۋدارعان.
قالعان توعىز سوتتالۋشى قارجى پيراميداسىنىڭ قىزمەتى ناتيجەلى جۇزەگە اسىرۋ ماقساتىندا سالىمشىلارعا بانكتىك رەكۆيزيتتەردى ۇسىنىپ جانە بانكتىك چەكتەردى قابىلداپ، پيراميدانىڭ جۇمىس جاساۋىنا ءوز ۇلەسىن قوسا وتىرىپ، پيراميدا ۇيىمداستىرۋشىسىنا بەلسەندى جاردەمدەسكەن.
سوتتالۋشىنىڭ كىناسى دالەلدەنەدى:
سوتتالۋشىلاردىڭ تاعىلعان ايىپ بويىنشا كىناسى ءىس بويىنشا جيناقتالعان قۇجاتتارمەن دالەلدەنەدى.
تاراپتاردىڭ ۇستانىمى:
پروكۋرور سوتتالۋشىلارعا باس بوستاندىعىنان ايىرۋ جازاسىن تاعايىنداۋدى، جەتى سوتتالۋشىعا قك-نىڭ 74-بابىن قولدانۋمەن جازاسىن كەيىنگە قالدىرۋدى سۇرادى.
جابىرلەنۋشىلەر زاڭعا ساي شەشىم قابىلداۋدى سۇرادى.
سوتتالۋشىلار كىناسىن ءىشىنارا مويىنداپ، باس بوستاندىعىنان ايىرمايتىن جازا تاعايىنداۋدى سۇرادى.
جازا بولىگىندە:
سوت، جازا تاعايىنداۋ بارىسىندا جەتى سوتتالۋشىنىڭ قىلمىستىق جاۋاپكەرشىلىگىن جەڭىلدەتەتىن ءمان-جايلار رەتىندە ءجاسوسپىرىم بالالارى بولۋىن تانىدى، اۋىرلاتاتىن ءمان-جايلار انىقتالمادى.
سوت، ق.-نى قك-نىڭ 217-بابى 3-بولىگىنىڭ 2)-تارماعىمەن، 218-بابى 3-بولىگىنىڭ 3)-تارماعىمەن، 422-بابىنىڭ 1-بولىگىمەن كىنالى دەپ تانىپ، وعان مۇلكىن تاركىلەپ، تۇپكىلىكتى 10 جىلعا باس بوستاندىعىنان ايىرۋ جازاسىن تاعايىندادى. قك-نىڭ 74-بابىنىڭ 1-بولىگى نەگىزىندە، جازاسىن وتەۋىن 1 جىل مەرزىمگە كەيىنگە قالدىردى.
توعىز سوتتالۋشى قك-نىڭ 28-بابى 5-بولىگى، 217-بابى 3-بولىگىنىڭ 2) تارماعىمەن كىنالى دەپ تانىلىپ، ولارعا 3 جىلدان 7 جىل ارالىعىندا باس بوستاندىعىنان ايىرۋ جازاسىن تاعايىندالدى. التى سوتتالعانعا قك-نىڭ 74-بابىنىڭ 1-بولىگى نەگىزىندە، جازاسىن وتەۋىن 3 جىل مەرزىمگە كەيىنگە قالدىردى. سونىمەن قاتار، قىلمىستى كامەلەت جاسىنا تولماعان كەزدە جاساعان سوتتالۋشىعا قك-نىڭ 63-بابى نەگىزىندە تاعايىندالعان جازا شارتتى دەپ بەلگىلەنىپ، وعان 1 جىل پروباسيا باقىلاۋ تاعايىندالدى.
سوتتالۋشىلارعا ازاماتتاردىڭ اقشالاي قاراجاتىن جانە ينۆەستيسيالاردى تارتۋمەن بايلانىستى قىزمەتپەن اينالىسۋ قۇقىعىنان ايىرۋ قوسىمشا جازاسى تاعايىندالدى.
تالاپ قويۋلار ءىشىنارا قاناعاتتاندىرىلدى. ۇكىم زاڭدى كۇشىنە ەنبەدى.
