ءماسليحاتتىڭ 19-سەسسياسىندا وبلىستىق ءماسليحاتتىڭ مەملەكەتتىك-قۇقىق ماسەلەلەرى جانە جەرگىلىكتى ءوزىن-وزى باسقارۋ جونىندەگى تۇراقتى كوميسسياسىنىڭ ءتوراعاسى ءومىرزاق مەلدەحانوۆ ۇسىنىس جاسادى.
وبلىستىڭ اكىمشىلىك-ىسكەرلىك ورتالىعى ورنالاسقان استانا داڭعىلىن ەلىمىزدىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ ەسىمىمەن اتاۋدى ۇسىندى. حالىق قالاۋلىسىنىڭ بۇل ۇسىنىسىن ءماسليحات دەپۋتاتتارى ءبىراۋىزدان قولدادى.
نۇرسۇلتان نازاربايەۆ ەسىمى بەرىلگەن العاشقى داڭعىل قازاقستاندا 2017 جىلى پايدا بولدى. 2017 جىلدىڭ 30 قاراشاسىندا الماتى قالالىق ءماسليحاتىنىڭ VI شاقىرىلىمىندا قالا تۇرعىندارىنىڭ كوپتەگەن ۇسىنىسى بويىنشا، قالالىق ونوماستيكا كوميسسياسىنىڭ جانە رەسپۋبليكالىق ونوماستيكا كوميسسياسىنىڭ كەلىسىمىمەن فۋرمانوۆ كوشەسىن – قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆ ەسىمىمەن اتاۋ تۋرالى شەشىم قابىلدانعان ەدى.
سەسسيا كەزىندە قالا اكىمى باۋىرجان بايبەك ونوماستيكالىق كوميسسياعا قايتالاناتىن 112 كوشەنىڭ اتىن وزگەرتۋ تۋرالى ۇسىنىس جاسالعاننان كەيىن، زيالى قاۋىم وكىلدەرى، قالا تۇرعىندارى جانە اسىرەسە جاستار تاراپىنان مەگاپوليستەگى باستى كوشەنىڭ ءبىرى - فۋرمانوۆ اتاۋىن تاۋەلسىز قازاقستاننىڭ ىرگەسىن قالاعان ەلباسىنىڭ ەسىمىنە وزگەرتۋ تۋرالى كوپتەگەن ۇسىنىس تۇسكەنىن ايتقان.
دەرەككوزى: كتك ارناسى
