شىمكەنتتە ديكيي ارماننىڭ دوسى مەن ونىڭ بانداسى اۋىر قىلمىس جاساعانى ءۇشىن سوتتالماق

قاراكوز امانتاي 21 اقپ. 2025 10:37 1887

شىمكەنتتە اۋىر قىلمىستار جاسادى دەپ ايىپتالعان سەگىز ادامعا قاتىستى سوت ءجۇرىپ جاتىر. ولارعا بوپسالاۋ، زاڭسىز باس بوستاندىعىنان ايىرۋ، قارۋ ساقتاۋ جانە قاساقانا اۋىر دەنە جاراقاتىن كەلتىرۋ سەكىلدى قىلمىستار تاعىلۋدا، دەپ حابارلايدى Dalanews.kz.

Orda.kz مالىمەتىنشە، ايىپتالۋشىلاردىڭ قاتارىندا ارمان جۇماگەلدييەۆتىڭ (ديكيي ارمان) جاقىن دوسى - 35 جاستاعى ءداۋىر تاۋكەيەۆ تە بار.

قالعان ايىپتالۋشىلار تۋرالى اقپارات از، تەك ولاردىڭ ءبىرى – بەكاسىل شىنجىربەكوۆ كاسىبي بوكسشى ەكەنى بەلگىلى. ول سپورتتىق جارىستاردا جاقسى ناتيجەلەر كورسەتكەن.

سوتتىڭ رەسمي دەرەكقورىندا بۇل قىلمىستىق ءىس بويىنشا تولىق مالىمەت جوق.

ەسكە سالايىق، بۇعان دەيىن باس پروكۋراتۋرا باكۋدە ديكيي ارماننىڭ دوسى جانبولات سەرىكوۆتىڭ ۇستالعانىن راستادى. كەيبىر ب ا ق مالىمەتىنشە، ول كەلىمبەتوۆتىڭ كۇيەۋ بالاسى، دەپ حابارلاعان ەدى Dalanews.kz BES.media-عا سىلتەپ. 

جانبولات سەرىكوۆ دۋبايدا قارجى پيراميداسى Finiko-نىڭ ۇيىمداستىرۋشىسىنا شابۋىل جاسادى دەگەن كۇدىككە ءىلىندى. 

قازاقستان رەسپۋبليكاسىنىڭ باس پروكۋراتۋراسى BES.media-نىڭ سۇراۋىنا جاۋاپ بەرە وتىرىپ، باكۋدە جانبولات سەرىكوۆتىڭ ۇستالعانىن راستادى. ب ا ق ونى بۇرىنعى ۇلتتىق بانك ءتوراعاسى قايرات كەلىمبەتوۆتىڭ كۇيەۋ بالاسى جانە “ديكيي ارمان” توبىنىڭ بەلسەندى مۇشەسى دەپ اتاۋدا.

باس پروكۋراتۋرانىڭ مالىمەتىنشە، ول بىرىككەن اراب امىرلىكتەرىنىڭ قۇقىق قورعاۋ ورگاندارىنىڭ سۇراۋى بويىنشا باكۋدە ۇستالعان. بۇل اقپارات قازاقستاننىڭ ازەربايجانداعى ەلشىلىگىنە سىلتەمە جاساي وتىرىپ بەرىلدى.

“سونىمەن قاتار، قازاقستان قۇقىق قورعاۋ ورگاندارى جانبولات سەرىكوۆكە قىلمىس جاسادى دەگەن ايىپپەن ىزدەۋ سالماعان، سوندىقتان ونى قازاقستانعا ەكستراديسيالاۋ ماسەلەسى قاراستىرىلىپ جاتقان جوق”، – دەپ حابارلادى باس پروكۋراتۋرا.

ىشكى ىستەر مينيسترلىگى BES.media-عا جانبولات سەرىكوۆقا قاتىستى قىلمىستىق ىستەردىڭ جوق ەكەنىن مالىمدەدى.

جانبولات سەرىكوۆ قارجى پيراميداسى Finiko-نىڭ نەگىزىن قالاۋشى ەدۆارد سابيروۆقا شابۋىل ۇيىمداستىرعان بولۋى مۇمكىن. Telegram-كانالىنداعى اقپاراتقا سايكەس، قىلمىسكەرلەر 327 مىڭ اقش دوللارىن (173،7 ملن تەڭگە) ۇرلاعان. شابۋىلدان كەيىن كۇدىكتىلەر ماسكەۋگە ۇشىپ كەتكەن، وندا ولار ءباا پوليسياسىنىڭ سۇراۋى بويىنشا ۇستالعان. جانبولات سەرىكوۆ 2024 جىلدىڭ 3 قاڭتارىندا ستامبۇلدان كەلگەننەن كەيىن باكۋدە ۇستالعان.

Orda.kzء-تىڭ مالىمەتىنشە، قاماۋدا وتىرعان ارمان جۇماگەلدييەۆ (ديكيي ارمان) جانبولات سەرىكوۆپەن دوس بولعان. ولار بىرنەشە رەت شەتەلدە جانە قازاقستاندا كەزدەسكەن.

جانبولات سەرىكوۆتىڭ Freedom Bank، بانك سەنتركرەديت جانە ForteBank الدىندا 3 ميلليارد تەڭگەدەن استام قارىزى بار. 2023 جىلدىڭ جەلتوقسانىنان باستاپ وعان قازاقستاننان شىعۋعا تىيىم سالىنعان.

راستالماعان اقپارات بويىنشا، ول بۇرىنعى ۇلتتىق بانك ءتوراعاسى جانە قازاقستان پرەمەر-مينيسترىنىڭ ەكس-ورىنباسارى قايرات كەلىمبەتوۆتىڭ كۇيەۋ بالاسى. جانبولات سەرىكوۆ شىنار نەماتوۆاعا، ەكس-شەنەۋنىكتىڭ قىزىنا ۇيلەنگەن دەپ كورسەتىلەدى.

اشىق دەرەككوزدەردە جانبولات سەرىكوۆتىڭ يەلىگىندە “كريستالل” تۇنگى كلۋبى بار ەكەنى ايتىلادى. بۇل نىساننىڭ 3،1 ميلليارد تەڭگە قارىزى بار.


ۇسىنىلعان
سوڭعى جاڭالىقتار