بۇگىن شىمكەنتتەگى وبلىستىق ورىس دراما تەاترىندا «اسقاقتاي بەر، استانا!» اتتى سالتاناتتى ءىس-شارا ءوتتى. شارا اياسىندا ەلىمىزدىڭ تاۋەلسىزدىگى مەن تاريحىن، جەتىستىكتەرىن ناسيحاتتايتىن «جاھان تانىعان جەتى تۇلعا»، «تۇلعا.تاۋەلسىزدىك.تاريح» اتتى «قازىعۇرت» باسپاسىنان جارىق كورگەن ەكى كىتاپتىڭ تۇساۋى كەسىلدى.
جيىندا ءسوز العان وبلىس اكىمى جانسەيىت تۇيمەبايەۆ ەكى كىتاپتىڭ مازمۇنى مەن مانىنە ەرەكشە توقتالىپ، جينالعانداردى استانا كۇنىمەن قۇتتىقتادى.
«بۇگىن تۇساۋى كەسىلگەن «جاھان تانىعان جەتى تۇلعا» - اتى ايتىپ تۇرعانداي الەمگە ايگىلى بولعان رەفورماتورلار تۋرالى كەڭىنەن تولعانىپ جازىلعان دۇنيە. ارينە ولاردىڭ ورتاسىنان ويىپ تۇرىپ ورىن العان ۇلى دالا پەرزەنتى، ۇلت كوشباسشىسى نۇرسۇلتان ءابىش ۇلى نازاربايەۆتىڭ تاۋەلسىز قازاق ەلىن قالىپتاستىرۋداعى قيىن دا، كۇردەلى كەزەڭدەردەن جول تاۋىپ شىققاندىعى باياندالادى. «تۇلعا.تاۋەلسىزدىك.تاريح» اتتى كىتاپتىڭ دا وزىندىك ەرەكشەلىگى بار. «ورداباسىعا ورالۋ» دەگەن العاشقى بولىمدە ەلباسىنىڭ قاسيەتتى مەكەنگە تابان تىرەگەنى تۋراسىندا تولعاناتىن تۇستار كوپ»،-دەدى جانسەيىت قانسەيىت ۇلى.
جالپى، «تۇلعا.تاۋەلسىزدىك.تاريح» اتتى كىتاپ ءۇش بولىمنەن تۇرادى. اتالعان تۋىندىدا «ورداباسىعا ورالۋ» دەگەن العاشقى بولىمدە ەلباسىنىڭ قاسيەتتى مەكەنگە تابان تىرەگەنى تۋراسىندا تولعاناتىن تۇستار جان-جاقتى قامتىلعان. كىتاپتىڭ ەكىنشى بولىمىندە ەلباسىمىزدىڭ شەتەل باسشىلارىمەن وڭتۇستىكتە كەزدەسۋلەرى ءساتتى سۋرەتتەرىمەن اڭگىمەگە ارقاۋ بولعان. ال ءۇشىنشى بولىمدە مەملەكەت باسشىسىنىڭ وبلىسىمىزعا 1991 جىلدان باستالعان ساپارلارى جان-جاقتى باياندالادى. باسىلىمعا تاياۋداعى وڭتۇستىك وڭىرىنە جاساعان ساۋىردەگى ساپارى دا ەنگىزىلىپ وتىر.
"جاھان تانىعان جەتى تۇلعا" كىتابىنىڭ اۆتورى اباي ەسكەندىروۆ اتالعان تۋىندىنى 4 جىلدا جازىپ شىققانىن ايتادى. 656 بەتتەن تۇراتىن تۋىندىدا تاريحي تۇلعالاردىڭ ەل باسقارۋ ۇردىسىندەگى عيبراتتى عۇمىرلارى اڭگىمەگە ارقاۋ بولعان. جەر جاھانعا اتى ءمالىم جەتى تۇلعانىڭ ءوز وتانداستارىنىڭ دا، جاتجەرلىكتەردىڭ دە ساناسىندا سەرپىلىس تۋدىرعان تاعدىرلارى ەشكىمدى بەيجاي قالدىرمايدى.
"كىتاپتىڭ جالپى مازمۇنى -جاھان تانىعان جەتى تۇلعا حاقىندا. دجوردج ۆاشينگتون، ماحاتما گاندي، ۋنيستون چەرچيلل، مۇستافا كەمال، شارل دە گولل، لي كۋان يۋ، نۇرسۇلتان نازاربايەۆ سىندى ۇلى جەتى تۇلعانىڭ ەرەن ەڭبەكتەرى جان-جاقتى قامتىلعان"-، دەيدى كىتاپ اۆتورى اباي ەسكەرمەس ۇلى.
شارا بارىسىندا وبلىس اكىم قوس كىتاپتىڭ جارىققا شىعۋىنا اتسالىسقان "قازىعۇرت" باسپاسىنىڭ ديرەكتورى، اقىن تەمىرعالي كوپبايەۆتى، "تاۋەلسىزدىك، تۇلعا، تاريح" قۇراستىرۋشىسى اسىلبەك دوسالىنى، «جاھان تانىعان جەتى تۇلعا» كىتابىنىڭ اۆتورى اباي ەسكەندىروۆكە العىس حاتپەن ماراپاتتادى. شارا سوڭى تەاتر فويەسىندەگى «ماڭگى جايناي بەر، استانا!» تاقىرىبىنداعى كىتاپ جانە فوتو كورمەسىنە جالعاستى.
