شىمكەنتتە الاياقتارعا 73 ميلليون تەڭگەسىن ساناپ بەرگەن ۆان ير چانگ ەسىمدى قىتايلىق كاسىپكەر ادىلدىك تاپپاي، ەلشىلىك جاعالاپ ءجۇر، دەپ حابارلايدى Dalanews.kz كتك ارناسىنا سىلتەپ.
مالدىڭ ىشەك-قارنىن قىتايعا الدىرىپ، سودان دەليكاتەس جاسايمىن دەگەن 45 جاستاعى شەتەلدىك الماتىدا ءۇش جىگىتپەن تانىسادى. ولار شىمكەنتتەگى قاساپحانالاردا تانىستارىنىڭ كوپ ەكەنىن ايتىپ، ءتورت ايدا "30 توننا تاۋار دايىنداپ قويدىق" دەپ، 73 ميلليون تەڭگە اقشا اۋدارتقىزعان.
"قازاقستاننان ىشەك-قارىن الدىرىپ، كومپانيا اشامىن دەپ ويلاعانمىن. الگىلەر كۇندەلىكتى ۆيدەومەن حابارلاسىپ، قويما تولى قىرىققابات دەپ اتالاتىن ىشەك-قارىندى كورسەتكەن سوڭ سەنىپ، اقشا اۋدارىپ وتىردىم. ناۋرىز ايىندا تاۋاردى كوزبەن كورمەككە كەلسەم، ەش نارسە جوق"، - دەيدىكاسىپكەر ۆان ير چانگ.
شەتەلدىكتىڭ ارىزىنان كەيىن ءىس قوزعاعان پوليسەيلەر كۇدىكتىلەردى ۇستاپ، 756 قاپ مۇزداتىلعان ىشەك قارىندى تاركىلەگەن. كۇدىكتىلەر دە اقشا العانىن، ءبىراق تاۋاردى بەرمەگەنىن مويىنداپتى. دەگەنمەن كوپ ۇزاماي ايعاق زات رەتىندە الىنعان دەليكاتەستى الاياق رەتىندە كۇدىككە ىلىنگەندەرگە قايتارىپ بەرە سالعان.
"ەشقانداي دا ماسەلە جوق، ءىس قىسقارتىلادى، ءبىز زاتتى ساتىپ جىبەردىك دەپ ايتقان، مويىنداعان"، - دەيدى ادۆوكات نۇرجان ءۇسىپحانوۆ.
جابىرلەنۋشىلەر كۇدىكتىلەردىڭ داۋىسى جازىلعان اۋديوجازبانى شىمكەنتتەگى پوليسيا باسشىلارى مەن پروكۋرورلارعا دا تىڭداتقان. ءبىراق ەشكىم سەلت ەتپەپتى. الدانعان كاسىپكەر قورعاۋشىلارىن الىپ بۇگىن پوليسيا دەپارتامەنتىنە تاعى باردى.
ءتارتىپ ساقشىلارى بۇل جولى دا قىلمىستىق ءىس قىسقارتىلعان دەپ قىسقا قايىردى.
"قۇقىقتىق قاتىناستاردىڭ ازاماتتىق ايادا قارالۋىنا بايلانىستى قىلمىستىق ءىستى توقتاتۋ بويىنشا شەشىم قابىلداندى. تەرگەۋدىڭ ۇشبۋىندى مودەلى اياسىندا اتالعان شەشىم پروكۋراتۋرامەن كەلىسىلگەن"، - دەپ جاۋاپ بەردى شىمكەنت پد رەسمي وكىلى باعلان يساتايەۆا.
ءقازىر كىناسىن مويىنداعان ءۇش جىگىتتىڭ قايدا ەكەنى بەلگىسىز. سونداي-اق اقشاسى تولەنگەن تاۋاردىڭ دا قاي جاققا كەتكەنىن ەشكىم بىلمەيدى. ال شىمكەنتتىڭ قۇقىق قورعاۋ ورىندارىنان ادىلدىك تاپپاعان شەتەلدىك ەندى ىشكى ىستەر مينيسترلىگىنە شاعىم تۇسىرمەك.
