Shymkentte alaiaqtarǵa 73 million teńgesin sanap bergen Van Ir Chang esimdi qytailyq kásipker ádildik tappai, elshilik jaǵalap júr, dep habarlaidy Dalanews.kz KTK arnasyna siltep.
Maldyń ishek-qarnyn Qytaiǵa aldyryp, sodan delikates jasaimyn degen 45 jastaǵy sheteldik Almatyda úsh jigitpen tanysady. Olar Shymkenttegi qasaphanalarda tanystarynyń kóp ekenin aityp, tórt aida "30 tonna taýar daiyndap qoidyq" dep, 73 million teńge aqsha aýdartqyzǵan.
"Qazaqstannan ishek-qaryn aldyryp, kompaniia ashamyn dep oilaǵanmyn. Álgiler kúndelikti videomen habarlasyp, qoima toly qyryqqabat dep atalatyn ishek-qaryndy kórsetken soń senip, aqsha aýdaryp otyrdym. Naýryz aiynda taýardy kózben kórmekke kelsem, esh nárse joq", - deidikásipker Van Ir Chang.
Sheteldiktiń aryzynan keiin is qozǵaǵan politseiler kúdiktilerdi ustap, 756 qap muzdatylǵan ishek qaryndy tárkilegen. Kúdiktiler de aqsha alǵanyn, biraq taýardy bermegenin moiyndapty. Degenmen kóp uzamai aiǵaq zat retinde alynǵan delikatesti alaiaq retinde kúdikke ilingenderge qaitaryp bere salǵan.
"Eshqandai da másele joq, is qysqartylady, biz zatty satyp jiberdik dep aitqan, moiyndaǵan", - deidi advokat Nurjan Úsiphanov.
Jábirlenýshiler kúdiktilerdiń daýysy jazylǵan aýdiojazbany Shymkenttegi politsiia basshylary men prokýrorlarǵa da tyńdatqan. Biraq eshkim selt etpepti. Aldanǵan kásipker qorǵaýshylaryn alyp búgin politsiia departamentine taǵy bardy.
Tártip saqshylary bul joly da qylmystyq is qysqartylǵan dep qysqa qaiyrdy.
"Quqyqtyq qatynastardyń azamattyq aiada qaralýyna bailanysty qylmystyq isti toqtatý boiynsha sheshim qabyldandy. Tergeýdiń ushbýyndy modeli aiasynda atalǵan sheshim prokýratýramen kelisilgen", - dep jaýap berdi Shymkent PD resmi ókili Baǵlan Isataeva.
Qazir kinásin moiyndaǵan úsh jigittiń qaida ekeni belgisiz. Sondai-aq aqshasy tólengen taýardyń da qai jaqqa ketkenin eshkim bilmeidi. Al Shymkenttiń quqyq qorǵaý oryndarynan ádildik tappaǵan sheteldik endi Ishki ister ministrligine shaǵym túsirmek.
