شىمكەنتتە 2020-2021 وقۋ جىلىنىڭ قورىتىندىسى بويىنشا وقۋشىلار ءبىلىم سايىستارىندا جاقسى كورسەتكىشتەرگە قول جەتكىزدى. ماسەلەن، ەلباسى اكادەمياسىنىڭ ۇيىمداستىرۋىمەن وتكەن «El umiti» جوباسىنا قالادان 500-دەن استام وقۋشى قاتىسىپ، رەسپۋبليكالىق كوميسسيانىڭ شەشىمىمەن 131 وقۋشى «ەلباسى مەدالى» يەگەرى اتاندى، – دەپ حابارلايدى Dalanews.kz شىمكەنت قالاسى اكىمدىگىنىڭ باسپا ءسوز قىزمەتىنە سىلتەمە جاساپ.

«ەلباسى مەدالى» – جاستاردى كەشەندى دامىتۋعا باعىتتالعان ۇلتتىق دەڭگەيدەگى جالعىز باعدارلاما. بۇل ماراپات 6 اي ىشىندە 7 باعىتتا بەرىلگەن تاپسىرمالاردى دۇرىس ورىنداعان جاستارعا بەرىلەدى. بۇل جوباعا بيىلعى جىلى قالاداعى مەكتەپتەردەن 1 مىڭنان استام وقۋشى قاتىسىپ وتىر.

بۇدان بولەك، رەسپۋبليكالىق بايقاۋلار مەن وليمپيادالاردا 69 وقۋشى جەڭىس تۇعىرىنان كورىندى. ال رەسپۋبليكالىق عىلىمي جوبالار سايىستارىندا – 10 وقۋشى جۇلدەلى ورىندى يەلەندى. سپورتتىڭ 10 تۇرىنەن وتكەن رەسپۋبليكالىق سايىستاردا شىمكەنتتىك وقۋشىلار 7 رەت چەمپيون اتاندى.

وعان قوسا، بيىل شىمكەنتتىك وقۋشىلار رەسپۋبليكا كولەمىندە 250-دەن استام عىلىمي جوبا وليمپياداسىنا قاتىسىپ، 55 وقۋشى جەڭىس تۇعىرىنان كورىنگەن. ال حالىقارالىق عىلىمي جوبالار بايقاۋىنان 2 وقۋشى جۇلدەگەر بولعان. سونداي-اق، 6 ءبىلىم ۇيىمى رەسپۋبليكا بويىنشا 100 «ۇزدىك» مەكتەپتىڭ ىشىنە ەنگەن.