شىعىس قازاقستاننىڭ مادەنيەت سالاسى ەل تاۋەلسىزدىگىمەن بىرگە تۇلەدى دەسەك، قاتەلەسپەيمىز. وڭىردە تامىرىن تەرەڭنەن تارتىپ، بۇگىنگە دەيىن ءتۇتىنىن ءتۇزۋ ۇشىرىپ وتىرعان مادەني بىرلەستىكتەر قانشاما. سولاردىڭ ءبىر شوعىرى – التايدا.

التايدىڭ مادەنيەت سالاسى كەيىنگى جىلدارى تىپتەن تۇرلەنە تۇسكەندەي. بۇل تۋرالى اۋدان باسشىسىنىڭ ءوز اۋزىنان ەستىدىك.

– قازىرگى ۋاقىتتا اۋداندا 13 كلۋبتىق مەكەمە، 27 كىتاپحانا جانە دوستىق ءۇيى جۇمىس ىستەپ تۇر. سەرەبريانسكىدە ەسكى اكىمشىلىك عيماراتتاردىڭ ءبىرىن جوندەپ، كوپفۋنكسيونالدى مادەني-دەمالىس كەشەنى ەتپەك ويىمىز بار. بەس قاباتتى عيماراتتا مادەنيەت ءۇيى، شىعارماشىلىق باعىتتاعى ءتۇرلى ۇيىرمەلەرى بار مۋزىكا مەكتەبى جانە سپورت زالدارى بولادى دەپ جوسپارلاپ وتىرمىز، – دەيدى التاي اۋدانىنىڭ اكىمى قاليحان بايعونىسوۆ.

اكىمنىڭ ايتۋىنشا 2013 جىلى بۇرىنعى «گورنياك» مادەنيەت ءۇيىن «گورنياك» مادەني-دەمالىس ورتالىعى رەتىندە قايتا قۇرىلعان. بۇگىندە اتالمىش ورتالىقتا حور، ءان جانە بي انسامبلدەرى، فولكلورلىق، وتباسىلىق انسامبلدەر، حالىق اسپاپتارى وركەسترلەرى، حورەوگرافيالىق، درامالىق، ەسترادالىق، ۆوكالدىق ۇجىمدار – جالپى 67 شىعارماشىلىق ۇجىم جۇمىس ىستەيدى. بارلىعى 61 قاتىسۋشى بار. 597 ادامدى قامتىعان 48 شىعارماشىلىق ۇيىرمە دە جۇمىس ىستەپ تۇر.

ال 2020 جىلى جاڭا بۇقتىرما كەنتىنىڭ جانە پارىگينو اۋىلىنىڭ مادەنيەت ۇيلەرى جاڭارتىلىپتى.

– مادەنيەت سالاسىنداعى ماڭدايالدى بەس ۇجىمدى ەرەكشە اتاپ وتكىم كەلەدى. ولار: «زىريانوچكا» بي ءانسامبلى، «ميريانە»، «سۋدارۋشكي»، «توۆارۋشكي» حالىقتىق فولكلورلىق انسامبلدەرى، «ۋزورە» بالالار ۇلگىلى فولكلورلىق ءانسامبلى. باسقا دا ۇجىمدارى تابىستى ونەر كورسەتۋدە. ايتالىق PRESTISSIMO ۆوكالدىق ستۋدياسىنىڭ تاربيەلەنۋشىلەرى جانە «اسسورتي» ۆوكالدىق ءانسامبلى، – دەپ تۇيىندەدى اۋدان اكىمى.

ەلىمىز تاۋەلسىزدىك العان ساتتەن باستاپ وركەندەگەن التايدىڭ مادەنيەت سالاسى الداعى ۋاقىتتا دا اۋداننىڭ اتىن ايگىلەيدى دەپ سەنەمىز