ۆيسە-پرەمەر الدىمەن سەمەي قالاسىنداعى بىرنەشە الەۋمەتتىك نىساندى ارالاپ، حالىقپەن كەزدەستى.
وندا قازاقستان پرەزيدەنتى قاسىم-جومارت توقايەۆتىڭ حالىققا جولداۋىندا ايتىلعان باسىم باعىتتار اڭگىمەلەنىپ، كەلەر جىلعى قازاقتىڭ باس اقىنىنىڭ 175 جىلدىق تويىنا دايىندىق جايى ءسوز بولدى.
بەردىبەك ساپاربايەۆ سەمەيدە جەدەل جاردەم اۋرۋحاناسىنىڭ جۇمىسىمەن، ونداعى جاقىندا اشىلىپ، ءساتتى جۇمىس ىستەپ تۇرعان گيبريدتىك وپەراسيا زالىمەن تانىستى.
مۇنان كەيىن ەلەكتروتەحنيكالىق كوللەدجدەگى اتقارىلىپ جاتقان ىلكىمدى جوبالاردى كورىپ، ۇستازدار قاۋىمىمەن جۇزدەستى. ال قالا حالقىمەن وتكەن باسقوسۋدا قازاقستان پرەزيدەنتى قاسىم-جومارت توقايەۆتىڭ جولداۋىندا ايتىلعان مىندەتتەر ەگجەي-تەگجەيلى باياندالدى.
ۇكىمەت باسشىسىنىڭ ورىنباسارى بەردىبەك ساپاربايەۆتىڭ شىعىس قازاقستان وبلىسىنا جاساعان ساپارى سەمەي قالاسىنان كەيىن اباي اۋدانىندا جالعاسىن تاپتى. مۇندا ول ءبىرقاتار الەۋمەتتىك نىساندى ارالاپ كورىپ، حالىقپەن كەزدەستى.
ونان كەيىن ات باسىن جيدەبايعا تىرەپ، وسىندا كەلەسى جىلى وتەتىن اباي قۇنانباي ۇلىنىڭ 175 جىلدىق مەرەيتويىنا دايىندىق بارىسىن پىسىقتاپ كوردى.
بەردىبەك ساپاربايەۆ باستاعان ۇكىمەتتىك دەلەگاسيا مۇندا دا اۋرۋحانا، مەكتەپ سياقتى نىسانداردى ارالاپ، اتقارىلىپ جاتقان شارۋالارمەن تانىستى.
ەڭ ماڭىزدىسى، دانىشپان اقىننىڭ تۋعان جەرىندە كەلەسى جىلى ماڭىزدى ناۋقان. اقىننىڭ ۇرپاقتارى جانە اۋىل اقساقالدارىمەن كەزدەسۋدە 175 جىلدىڭ مەرەيتويدىڭ ەل مەرەيىن ۇستەم ەتەر بەرەكەنىڭ باستاۋى ەكەنى باسا ايتىلدى.
جيدەبايدا وتكەن باسقوسۋدا حاكىم ابايدىڭ مۇرالارىن ۇرپاق جادىندا قالدىرىپ، شەتەلگە ناسيحاتتاۋ جوسپارى دا ايقىندالدى.
–جوسپاردىڭ ءبىرى – قۇنانباي اتامىزدىڭ مۋزەيى. سنىمەن قاتار اباتتاندىرۋ جۇمىستارىن، ۇرپاققا ۇلگى شارالاردى قاراستىرىپ جاتىرمىز، – دەدى مادەنيەت جانە سپورت ءمينيسترى اقتوتى رايىمقۇلوۆا.
